Dapi uonn porscha igl UPF GR scolaziuns entras instructurs ellas regiuns. Nus essan sedecidi da far nies exercezi communabel dils 15 da mars 2004 ensemen cun mai Augustin Calivers. Segidai cun el ein: cap Urs Paulin, cap Fritz Steinmann e cap Linus Capaul.
Igl exercezi ha giu liug a Curaglia. Officiers e meinagruppas han giu dus programs separai. Sut anfleis Vus ord motivs d‘organisaziun mo maletgs dalla scolaziun dils meinagruppas, quei che vul buca dir ch‘ils officiers hagien luvrau nuot. Anzi, per omisduas gruppas ei la lavur stada intensiva ed interessanta.
Ils officiers ein sedai giu cun l‘organisaziun d‘in post da commando per in seracass pli grond. En ina part teoretica han els empriu d‘enconuscher il sistem e la funcziun d‘in tal post, mieds ed instruments per endrizzar quel e l‘organisaziun sco tala. Silsuenter ha ei giu num metter entuorn igl empriu ella pratica. Sut il commando da Florentin Tenner ha mintga officer, resp. representant d‘autras instituziuns, survegniu ses pensums. Era ina conferenza da pressa ha buca muncau.
Meins teoretic e dapli pratica han ils meinagruppas giu. Els ein sefatschentai da rudien cun il carr per barschaments d‘uaul. Suenter in‘introducziun ell‘organisaziun dallas basas cun material special per tals barschaments, ha Fritz Steinmann presentau il material e lur funcziun.
Il material che sesanfla sin il carr ei d‘aulta qualitad. Per gronda part setracta ei da material ch‘ei vegnius sviluppaus a Canada, nua ch‘ins ha adina puspei da sbatter encunter incendis d‘uaul.
Suenter ver empriu d‘enconuscher il material ha ei giu num duvrar el ella pratica. Plirs posts da lavur ein vegni endrizzai: ina gruppa ha montau il puoz per il helicopter, ina secunda gruppa ha procurau per aua en quel ed ina tiarza gruppa ha fatg ina sempla tschaffada per aua cun il material avon maun.
Highlight ei denton forsa gnanc il carr d‘uaul staus, mobein plitost il niev auto da pressiun da Laax. Secapescha che cumandant Linus e manischunz Fritz ein stai loschs da mussar quel. Ed a nus ha la demonstraziun era plaschiu.
