Gest dado la Punt Russein, denter la via cantunala ed il Rein schaian las restonzas dalla Tuor da Travaulta. Postada sin in grep, controllavan ils signurs dalla tuor il traffic tras la val. Il passadi da Falens a Pardomat-dado ei stretgs ed ideals d’incassar tributs dils viandonts. Igl inimitg ha paucas schanzas sch’el vegn attaccaus dallas teissas plauncas anora ed el sez sesanfla el funs dalla val.
Il grep ni crap sil qual la Tuor da Travaulta schai sparta la Cadi en duas parts: la part sur il crap e la part sut il crap (latin: saxum). Aschia sedattan las parts Sursassiala e Sutsassiala. Alla Sursassiala appartegnan las treis vischnauncas da Mustér, Tujetsch e Medel. Il num ei ideals per la nov’organisaziun da pumpiers dapi l’entschatta schaner 2009.
Gia 1998 s’entaupan las treis vischnauncas sisum la Cadi per contrahar davart ina fusiun. Mo il temps ei aunc buca madirs. El decuors da 2006 offniescha la vischnaunca da Tujetsch ch’ina collaboraziun pli stretga seigi giavischada. 2008 ha liug l’emprema sesida e la finamira ei clara: ils treis corps da pumpiers duein esser fusiunai silla fin digl onn.
La nov’organisaziun Pumpiers Sursassiala porscha avantatgs a tuttas treis vischnauncas. En mintga cass vegn la segirtad augmentada, quei cun restrenscher il diember dils pumpiers. La concentraziun dallas forzas e dallas finanzas lubescha da crear ina basa da pumpiers ferma e promta per ils seracass digl avegnir.
Suandonts survetschs porscha la Basa da Pumpiers Sursassiala
- agid per persunas, animals, ambient e beins, materials e prighel
- basa da salvament per la Cadi
- basa per igl agid stradal
- basa per la defensiun ABC
- basa per il cumbat encunter incendis d’uaul
- basa per accidents silla viafier
- basa da ventilatur a gronda prestaziun
- survetsch da shuttle 144
86 pumpieras e pumpiers fan part dall’organisaziun. Plinavon ein 15 persunas dallas uniuns samaritanas integradas el concept. Ensemen cul Survetsch da salvament Surselva (144) e la polizia cantunala a Mustér procurein nus per la segirtad e sanadad dalla populaziun sin nies intschess.
