Cordial beinvegni!
Ti sesanflas silla pli veglia pagina da pumpiers dil cantun Grischun. Dapi la stad 1998 provedin nus la publicitad cun informaziuns davart noss’organisaziun, quei per romontsch e tudestg. Nossa pagina cuntonscha buc mo persunas indigenas, mobein ei era enconuschenta lunsch sur ils cunfins dalla tiara.
Ils pumpiers da Medel/Lucmagn, Tujetsch e Mustér fuorman communablamein in’organisaziun da pumpiers, tenor la surfatscha la gronda dil cantun Grischun. Sper las lavurs da basa provedin nus era la regiun Cadi sco center d’intervenziun e purschin ulteriurs survetschs naziunals.
Aschia giavischein nus a ti bien divertiment da fuffergnar tras nossas informaziuns.
Tes Pumpiers Sursassiala
Scamond absolut da far fiug!
Observei il scamond absolut da far fiug en l’entira regiun! Cuntravenziuns vegnan denunziadas. Ils cuosts d’intervenziun dils pumpiers vegnan adossai alla persuna che ha caschunau igl alarm.
Tgei munta il scamond absolut da far fiug?
Ordvart la zona da baghegiar ei mintga fiug scumandaus. Quei vala en spezial per fiugs da gril, fiugs da campar, scadialas da fiug sco era per barschar material.
Ultra da quei eis ei scumandau:
- d’utilisar apparats ni exequir lavurs che san producir brastgas ni sbenzlas (p. ex. tagliacrappa, apparats da segar cun nezzas da metal), sche quei sa caschunar prighel d’incendi;
- fierer naven cigarettas ed auter uorden da fimar;
- d’utilisar objects pirotecnics.
Co astgel jeu grillar enteifer la zona da baghegiar?
Enteifer la zona da baghegiar astgan ins da principi grillar. Ei valan denton las suandontas prescripziuns:
- Grils da gas ed electrics astgan vegnir duvrai.
- Grils cun cotgla ni lenna ston vegnir duvrai aschia che negin sgol da brastgas ei pusseivels.
- Fiugs aviarts (p. ex. scadialas da fiug ni plazzas da fiug aviartas) ein scumandai.
- Per tuts ils grils – cun excepziun dils grils electrics – sto vegnir teniu ina distanza minimala da 1,5 m tier baghetgs.
- In mied da stizzar adattau sto adina esser promts per diever.
- Il gril sto vegnir survigilaus duront igl entir il temps
- Il gril sto star sin in fundament nuninflamabel.
- Suenter il diever sto la plazza da gril vegnir stizzada cumpleinamein. Cotgla e tschendra astgan vegnir dismessas pér cura ch’ellas ein cumpleinamein sferdentadas (per regla buc avon 48 uras).
- Buc grillar tier ferm vent, demai che tschendra ni brastgas san vegnir sufladas naven.
- En vischinonza immediata dil grill^ astga ei buca haver material inflamabel (lenna, cartun, mobiglias da curtin, parisols, seivs e.u.v.).
- Affons ed animals da casa duein vegnir teni naven dil gril.
- Avon l’utilisaziun d’in gril da gas ston las colligiaziuns ed ils ventils vegnir controllai sin lur intactadad.
- Suenter grillar sto il gas vegnir serraus giu vid la butteglia.
- Tschendra ni restonzas da gril astgan buca vegnir dismessas en recipients ni containers da plastic.
- Il gril astga vegnir bandunaus ni mess naven pér cura che negin prighel d’incendi exista pli.
