Tgunsch in scenari da horror per tuts pertuccai. Quei vala naturalmein era per in accident. Mintgina e mintgin da nus giavischa agid, schi spert sco pusseivel.
Per garantir quei aschi bein sco pusseivel dat ei standards d’intervenziun per l’entira Svizra (ed igl exteriur). Enteifer 15 minutas sto in emprem element d’intervenziun esser sil plaz. Quei munta concret: In vehichel cun pusseivladad da stizzar ed ina equipa cun protecziun dalla respiraziun che sa intervegnir. Tier nus en Sursassiala funcziunescha quei mo sche nus vein en mintga vischnaunca in local da pumpiers cul material necessari e naturalmein era il persunal vitier. Gest a Medel e Tujetsch ei quei ina gronda sfida: Mo cun breigia vegnin nus da tener il diember da pumpieras e pumpiers che nus stuein ver. Perquei duvrein nus tei!
Ils Pumpiers Sursassiala ein in dils pli gronds corps da pumpiers dil Grischun. Nus possedein in equipament fetg modern e sil pli niev stan dalla tecnica. In bien cader procura che nies persunal ei scolaus il meglier pusseivel. Quei fagein nus duront 10 exercezis per onn mintgamai la sera duront duas uras. Sper il survetsch normal da pumpiers nua ch’ei va cunzun per stizzar fiug, fagein nus plirs survetschs per la regiun Cadi ed ina gronda part dalla Surselva. Tier accidents sin via e binari, tier havarias cun chemicalias ed era el tunnel da basa dil Gottard essan nus presents per segidar sch’ei dat accidents ni problems. Quella lavur vegn fatga da nos specialists che possedan ina scolaziun supplementara. Cun tut quei che marscha aunc dasperas semeglia igl onn da pumpiers buca lungurus e mintgina e mintgin decida sezza/sez tgei engaschi ch’el impunda. Grond engaschi munta dapli alarms ed aschia dapli acziun. Era zatgei per tei? Lu scriva inagada ad info@pumpiers.ch, nus vegnin a contactar tei
Tias premissas ein:
capir romontsch
buna cundiziun fisica e psichica
dimora e plaz da lavur cumplein ella regiun
min. 18 onns e max. 40 onns (vegliadetgna regulara finescha cun 45 onns)
19-8-2021. Nus vein giu plascher d’astgar beneventar il cussegl da vischnaunda da Mustér tier nus. Sut il presidi da nies officier Giusep Lozza han els schau informar duront ina ura e miez davart nossa organisaziun.
15-7-2021. Unimogs ein secumprovai tier armada e pumpiers. Quei fatg ha dau da ponderar tgei far cun nies Unimog da 30 onns. Specialists han discussegliau da vender il vehichel – aunc oz dat ei sper via buca zatgei semegliont ni meglier. Il vehichel staus cumpraus novs ei en bien stan, motor e chassis construi per la perpetnadad. Aschia essan nus sedecidi da schar reveder il vehichel. La firma Rosenbauer ha surpiu l’incarica. Suandontas lavurs ein vegnidas fatgas: refrestgentar cumplettamein cabina e chassis e conservar tut da niev, per part colurar da niev suenter ver allontanau la ruina, servis grond da motor e remplazzament dall’electrica, revisiun da freins e remplazzament da pneus, nova construcziun davostier cun niev tanc e nova pumpa moderna. Aschia spargnein nus rodund 300’000 CHF, vein in vehichel cumprovau e schizun da mo 210 cm ladezia che survescha segir puspei pils proxims 20 onns.
Pil mument succedan las lavurs da construcziun en detagl ad Oberglatt ZH. Muort vacanzas sestauscha la furniziun dil vehichel sin miez settember. Tier la discussiun da construcziun, vesend per l’emprema gada nies niev/vegl vehichel essa nus tuts stai surpri: in vehichel bunamein novs cun la pli moderna tecnica steva avon nus. Detagls suondan lu il settember cheu sin nossa pagina.
La presentaziun e surdada ufficiala succeda ils 10 d’october 2021 allas 11.00 uras a Sedrun.
28-4-2021. Avon gest in onn ei in da nos bus vegnius donegiaus duront in seracass taluisa ch’ina reparatura fageva buca pli senn pil vehichel da bunamein 20 onns. Aschia vein nus envidau treis firmas specialisadas ed in garaschist local dad offerir in niev vehichel. L’incarica ei vegnida surdada alla firma Toni Brändle SA da Wängi el cantun Turgovia.
Oz havein nus astgau prender encunter in bellezia niev vehichel, bein endrizzaus e preparaus pil survetsch. Il vehichel dil tip VW Caravelle T6.1 ei staziunaus a Curaglia e survescha leu agl emprem element d’intervenziun sco vehichel da transport. El ei equipaus cun material per la protecziun da respirar. Sper las installaziuns ordinarias pils pumpiers posseda il vehichel era ina illuminaziun circulara ed in sistem per cargar las cameras termicas, ils funcs e las cazzolas. Cun nies design extern fa il vehichel biala pareta ensemen cun ils ulteriurs dalla flotta. Cun la firma Brändle vein nus danovamein giu in partenari cumpetent e serius, nuncumplicau ed innovativ. L’inauguraziun ufficiala suonda pli tard.
28.4.2021. Vor ziemlich genau einem Jahr wurde bei einem Einsatz unser Toyotabus seitlich stark beschädigt. Eine Reparatur lohnte sich nicht, da das Fahrzeug bereits rund 20 Jahre alt war. So luden wir drei Fahrzeugbauer und einen einheimischen Garagisten ein, uns ein neues Fahrzeug zu offerieren. Das Rennen machte die Firma Tony Brändle AG in Wängi TG.
Heute durften wir ein wunderschönes und zweckmässig eingerichtetes Fahrzeug entgegen nehmen. Die VW T6.1 Caravelle besitzt 8 Sitzplätze und ist mit 4 Atemschutzgeräten samt Zusatzmaterial ausgerüstet. Das Fahrzeug ist nun in Curaglia untergebracht und dient dort dem Ersteinsatzelement Medel als Atemschutzbus. Weitere Besonderheiten sind neben dem klassischen Feuerwehraufbau: die LED-Umfeldbeleuchtung und verschiedene elektrische Installationen für Lampen, Wärmebildkameras und Funkgeräte. Abgerundet wird das Fahrzeug durch unser Design und passt somit perfekt zur Gesamtflotte. Mit der Firma Brändle hatten wir einmal mehr einen unkomplizierten, innovativen und kompetenten Parter zur Seite. Die offizielle Übergabe und Fahrzeugtaufe erfolgt später.
Tier la sanaziun dallas gallerias Scopi 1+2 ei vegniu decidiu da serrar la vart encunter il lag per evitar che neiv/cufla possien entrar. Cheutras s’augmenta la segirtad e la via resta schetga era duront dis da malaura. El medem mument semidan las gallerias en in tunnel. Quei pretenda installaziuns da segirtad ed urgenza.
Mesiras previdas
Las mesiras pretendidas vegnan dadas avon dalla Confederaziun, gest tenor classa dalla via e dil tunnel. Ord quellas mesiras vegn sviluppau in concept da salvament per las forzas d’intervenziun. Ina mesira generala pretenda ch’ina intervenziun sappi vegnir fatga da mintga vart dil tunnel. Quei pretenda che dus corps da pumpiers, mintgamai in da mintga maun, intervegnan tier in accident. Pil niev tunnel ei quei empau special. Da vart nord ein ils Pumpiers Sursassiala equipai per ina intervenziun, da vart sid ein quei ils Pumpiers Biasca. Quei corp da pumpiers ei denton era involvaus el salvament tier accidents sill’autostrada A2, il Lucmagn ha pia secunda, sche buc tiarza prioritad. Cunquei ch’il tunnel sesanfla diltuttafatg sin territori grischun, han ils planisaders stuiu sligiar il problem. Quei ha menau a suandonta sligiaziun: sur il tunnel ei vegniu construiu ina via supplementara pils vehichels gronds da pumpiers. La via sa vegnir nezegiada ella situaziun normala da pedunzs e velocipedists. Tier in incendi el tunnel pussibilitescha ella duront la stad als pumpiers da contonscher il portal sid ed aschia far l’intervenziun sco pretendiu da duas varts. La rampa da vart sid ei construida, ina secunda suonda culla nova construcziun dil tunnel 3 era davart dil nord.
Il tunnel vegn equipaus cun tuttas mesiras da segirad: Sper ina illuminaziun succedan era sistems da signalisaziun e detecziun da fem e fiug. Tuts sistems d’alarm ein colligiai directamein cullas centralas da polizia ed uffeci da construcziun bassa. Entras midar las gallarias en in tunnel sedat in ulteriur problem, numnadamein quel dalla ventilaziun. Ina ventilaziun stabla ei cumplicada e cumbinada cun gronds cuosts. In tgamin che fuss necessaris amiez il tunnel ei muort ils vaus da lavinas buca pusseivels. Aschia ei vegniu construiu 6 nischas da salvament. Duront la stad contonschan ins sur quellas ed ulteriuras sortidas d’urgenza il liber. El medem mumnet san ils pumpiers entrar, era naven dalla via d’urgenza sur il tunnel. Las installaziuns persuenter vegnan fatgas la stad proxima. Duront igl unviern scappan persunas ellas nischas ch’ein ventiladas cun aria frestga e possedan ina surpressiun, aschia ch’il fem sa buca entrar. Las persunas vegnan allura spindradas ord quellas entras ils pumpiers.
Per ch’ils pumpiers sappien entrar el tunnel drova ei in ventilatur a gronda prestaziun. Tenor ils quens sto quel puder muentar rodund 4 tonnas aria. Il ventilatur movibel vegn posiziunaus davon in portal, gest tenor situaziun dall’aura e liug digl accident el sid ni nord. Cunquei che la via sur il tunnel sa buca vegnir duvrada duront igl unviern, sto ei esser pusseivel da saver sgular il modul cul ventilatur. Aschia ei il meinacziun dils pumpiers libers da decider da tgei maun ch’el drova quella maschina.
La garanzia da segirtad el tunnel ei ina sfida pil proprietari, denton era per las forzas d’intervenziun. Cun in concept da segirtad elaboraus da tuttas instanzas pertuccadas sa il prighel vegnir sminuius sin in minimum.
Indicaziuns davart il ventilatur
La tscherca dad ina maschina adattada pil tunnel ei buca stada sempla. ensemen culla GVG vein nus evaluau pliras sligiaziuns, naven dil sempel ventilatur entochen al roboter da stizzar. L’aura malguessa sil pass, l’altezia da varga 1900 meters sur mar ed il realtiv liung viadi han pretendiu sligiaziuns specialas. La firma VOGT SA dad Oberdiesbach BE ha purschiu ina sligiaziun cun in ventilatur che porscha avunda prestaziun, che sa denton el medem mument era vegnir transportaus cun helicopter sils 2000 meters sur mar. Peisa, cumpactadad e prestaziun han decidiu davart l’investiziun dad in quart milliun francs.
marca e tip
BIG L105 PI
prestaziun da suflar
600’000 m3/h
prestaziun da tschitschar
35’000 m3/h
spertadad dall’aria
50 m/s (= 180 km/h)
forza da stuschar
2000 Newton
ejecturs dad aua
10, 200 l/min (7 bar)
motor
55 kW/130 Nm
peisa
750 kg
transport
modul sin rodas, pusseivels da transportar cun helicopter
material accessori
2 ventilaturs pigns, luttas per canalisar l’aria, uders
Il ventilatur sa era vegnir duvraus per ulteriuras incaricas tier incendis da baghetgs e garaschas sutterranas.
24-11-2020. Oz vein nus priu cumiau da niev vegl auto-cistiarna a Sedrun ch’ei vegniu menaus tier la firma Rosenbauer SA ad Oberglatt. Da leu vegn il viadi a cuntinuar tochen a Leonding sper Linz ell’Austria, ella producziun principala da Rosenbauer. Il vehichel ha prest 30 onns, denton mo paucs kilometers. Quei ei bia memia pauc per dismetter el tier il fier veder. Il cuntrari: cun in refurbishment savein nus guder vinavon dus gronds avantatgs: la construcziun stretga cumprovada sin vias d’uaul ed en gassas (210 cm) ed ina nova tecnologia da stizzar. Auter che la cabina ed il chassis, che vegnan revidi – ei dat pil mument aunc tocca da remplazzament -, vegn tut igl auter remplazzau entras parts novas: la construcziun davos e la pumpa, l’electrica ed electronica. Il resultat vegn ad esser in vehichel quasi niev per ina tiarza dil prezi d’in vehichel niev. Il mars vegn il vehichel puspei menaus anavos en Svizra e leu succeda lu la construcziun fina. Miez zercladur astgein nus lu puspei prender encunter el ed essan gia oz spir tensiun da veser il product finiu.
Dapi ils 1 da matg ha il survetsch da salvament Surselva surpriu era la regiun Cadi. Duront la notg e la dentersesiun accumpignein nus il miedi d’urgenza sch’ei fa da basegns e vegnin cull’ambulanza sil plaz per che tut material da salvament stetti a disposiziun. El medem mument coordinein nus l’arrivada dil helicopter e vegnin cul miedi dalla REGA e persunal sil plaz. Sch’ei fa da basegns segidein nus era sin auters camps cul persunal da sanitad. Nossa scolaziun succeda entras il survetsch da salvament Surselva.
Adrian Vincenz e Robin Flury han absolviu cun success igl examen da camiun C118 e cumpleteschan uss nies team da manischunzs. Cordiala gratulaziun e bien engraziament pigl engaschi!
28-9-2019. Luca Cajacob e Severin Deflorin han visitau cun success il cuors da basa ABC a Domat. Els cumpletteschan ussa nossa gruppa specialisada sin havarias ABC e manetgnan aschia nies ault nivel da scolaziun. Pierino Bisquolm ei staus sco instructur presents al cuors. Cordiala gratulaziun! {gallery}ABC cuors 2019{/gallery}
24-5-2019. Dominik Waldmeier e Ricardo Monn han absolviu cun succes il cuors dad officiers a Tusaun. Cordiala gratulaziun! Omisdus empleinan duas ruosnas impurtontas ela cader dalla Val Tujetsch e Medel. Sco officiers san els surpender l’incarica dil meinacziun en quellas duas vals. Nus giavischein ad els bia cletg e cunzun plascher vid il niev pensum!
Nus utilisein cookies sin nossa website per regurdar e segidar cun tei davart experientschas relevantas tier visetas repetidas. Entras clicar “Acceptar tuts”, dattas ti a nus la lubientscha dad acceptar tuts cookies. Ti sas denton era visitar "Definar cookies" per adattar Vies consentiment. Dapli informaziuns anflas ti sut informaziuns.
This website uses cookies to improve your experience while you navigate through the website. Out of these, the cookies that are categorized as necessary are stored on your browser as they are essential for the working of basic functionalities of the website. We also use third-party cookies that help us analyze and understand how you use this website. These cookies will be stored in your browser only with your consent. You also have the option to opt-out of these cookies. But opting out of some of these cookies may affect your browsing experience.
