24-8-2021. La tiarza jamna d’uost ha nies pumpier Sandro Tomaschett frequentau il cuors da meinacziun e cunquei terminau sia scolaziun sco instructur. Il cuors bein organisau ha giu liug a Mendrisio da bialaura e temperaturas pulitamein cauldas. L’entschatta ella jamna fetg interessanta ed intensiva han ils participonts dau cugl exercezi „firefox“; ina catscha da zenslas atras Mendrisio cun differents pensums en connex culs pumpiers. Duront las lecziuns dils participonts han tut ils presents saviu profitar dalla savida dils collegas da classa e consequentamein era saviu approfundir ed amplificar lur savida arisguard las tschun fasas d’intervenziun ed il ritmus da menar. Plinavon ei era la metodica vegnida reflectada e discussiunada – in punct central pils instructurs. Ultra da quei program ei vegniu absolviu differentas percuorsas partenent l’enconuschientscha da baghetgs, il ritmus da menar e metodas dad intermediar ils temas suranumnai. Aschia han ils participonts saviu emplenir lur sacados di per di cun ina pluna savida dil fatg e metodica. Il punct culminont dil cuors ei staus la gievgia. Quei di ha mintga classa astgau preparar e menar atras in exercezi en fuorma da seracass per corps da pumpiers dalla regiun. La classa 4 ha preparau dus seracass (accident da traffic e barschament d’in ladretsch) pils pumpiers da Cadenazzo. Igl exercezi ei gartegiaus cumpleinamein ed ils 11 pumpiers da Cadenazzo han mussau oreifer engaschi, han luvrau ruasseivlamein ed efficientamein. Naturalmein ha ina spaghettata buc astgau muncar suenter igl exercezi. Per finir ha la classa aunc scret in feedback als pumpiers da Cadenazzo. Suenter il discuors da qualificaziun ed in apèro han ils participonts allura astgau turnar a casa cun ina pluna savida ed impressiuns positivas. Cordial engraziament al corp da pumpiers Mendrisiotto pil cuors organisau stupentamein! 

8-5-2021. Sco mintg’onn avon il di dalla mumma vein nus viseta dalla Giuventetgna Cadi. Duront in di san els fuffergnar tiels pumpiers. Uonn ein 15 giuvenils e per l’emprema gada era giuvnas stai dalla partida.

La jamna dils 3 tochen ils 7 da matg ha nies pumpier Sandro Tomaschett frequentau il cuors da basa per instructurs a Seewen el cantun Sviz. Sigl areal beinendrizzau ein ils participonts vegni scolai intensivamein en vesta a lur pensum sco instructur, quei cun agid d’ina buna mischeida da teoria e pratica. Susteni ein ils futurs instructurs d’in maun vegni dils scolasts da classa fetg cumpetents, sco da l’auter maun era entras la formatura da carschi. Las persunas numnadas han capiu da colligiar la teoria culla pratica – quei per gronda part a moda giugonta e fetg sempla. Lur feedback ed encuraschament d’ughegiar dad ir vias novas ha promoviu la creativitad dils participonts, aschia che las lecziuns ein vegnidas di per di qualitativamein meglieras. Tut priu havein nus tuts saviu profitar nundetg dils inputs retscharts e dallas experientschas fatgas eifer quella jamna fetg intensiva, denton era nundetg interessanta. Il cuors da basa ei denton mo l’entschatta dalla via digl instructur; uss vala ei da star vinavon „vid il bal“ e dad esser aviarts pils proxims pass e la lavur en connex cugl instruir. 

01-05-2021. La sonda dils 1 da matg ha la gruppa da VIA/ABC frequentau il di da cuors ABC sigl areal dalla EMS Chemie a Domat. Dils experts da chemia Rolf Schläpfer, Joachim Maigut e Remo Böni havein nus pumpiers dalla Sursassiala retschiert eifer otg posts divers inputs teoretics. Quels havein nus secapescha era mintgamai astgau exercitar praticamein en differentas situaziuns – quei cun agid dil material digl agen camiun ABC. Ultra da quei havein nus era astgau emprender d’enconuscher in pèr paucas novas caussas. Entras la lavur en gruppas plitost pintgas ha mintgin giu la caschun da tschappar en e rimnar atgnas experientschas. Tras atras han ils instructurs leutier capiu da far attents nus sin detagls impurtonts e dad aschia slargar nossa savida en caussa. Aschia han tuts saviu profitar sin ina moda ni l’autra dil cuors. Quella savida vala ei ussa dad enfirmir per saver applicar ella els seracass che spetgan nus el territori dalla Sursassiala.

9-9-2020. Luca Cajacob ha dumignau cun success igl examen C118 ed astga ussa carrar cun tuts vehichels da pumpiers. Cordiala gratulaziun! Duront las davosas jamnas ha el giu bia carradas ed ei vegnius sustenius da Pierino Bisquolm e Lucas Schnoz, dus versai maschinists.

28-8-2020. Robin Flury ei nies niev officier. Cun success ha el absolviu la jamna da scolaziun a Tusaun. Aschia cumpletescha el nies team da cader sco persuna impurtonta, maschinist ed um da professiun. Cordiala gratulaziun!

Fotos: C. Caduff

29.9.2018. ABC-Weiterbildungstag in Domat/Ems auf dem Areal der EMS Chemie. Wie alle zwei Jahre fahren wir auch dieses Jahr nach Ems, um uns im Bereich ABC weiterzubilden. „Sich auf das Wesentliche konzentrieren“ heisst dieses Jahr die Devise, die Kurskommandant Rolf Schläpfer zusammen mit seinen Instruktoren Remo Böni, Pierino Bisquolm (unser interner ABC Spezialist), Daniel Stefanelli, Joachim Maigut und Daniele Succetti ausgesucht haben. Wir wiederholen einige bekannte Dinge, erfahren aber auch viel Neues: vor allem im Hinblick auf die Neuausrichtung der ABC-Stützpunkte im Kanton wird das gesamte Materialsortiment vereinheitlicht und somit auch die Ausbildung und der Einsatz vereinfacht. Wir haben verunfallte Personen dekontaminiert und gerettet, die Grenzen der neuen Membranpumpe ausgelotst, das Umpumpen und die Funktionsweise von Zisternenwagen angeschaut, ABC Messungen vorgenommen, die Funktionsweise von modernen Batterien angeschaut, schwierige Löcher abgedichtet und in einer Einsatzübung eine komplexere Personenrettung mit Deko-Zone durchgeführt. Mögen auch die Änderungen anfangs für Verwirrung gesorgt haben, ist es wichtig, dass einfach vorgegangen wird. Dies gilt übrigens für das gesamte Feuerwehrwesen. So konnten wir wieder mit einem gefüllten Rucksack und „geupdated“ nach Hause kehren. 

In rund zwei Monaten erhalten wir das neue ABC-Fahrzeug, mit neuem Material. Nun sind wir bereits dazu ausgebildet, für einen Bereich im Feuerwehrwesen, der nicht so leicht zu bewältigen ist.

28-11-2017. La primavera 2016 ha l’Assciranza d’edifecis dil cantun Turitg GVZ salvau siu cuors da cumandants a Mustér. Ils Pumpiers Sursassiala han procurau per l’organisaziun. Il cuors ha buca mo purtau alla regiun buna reclama, mobein era creau novs contacts culla Bassa. Sco engraziament han tut ils interessents dils Pumpiers Sursassiala astgau passentar la jamna vargada, ils 28 e 29 d’ocotober, dus dis a Kloten ed Andelfingen tier la GVZ.

Alla plazza aviatica

Tgei che spitgava sils 20 pumpiers dalla Surasssiala era buca propi clar, il program cunteneva sulettamein il plaid „surpresa“. Denton essan nus parti cun bien sentiment encunter Turitg per vegnir beneventai alla plazza aviatica da Kloten. Marcel Wirz, ch’ei in dils capo-menaders dalla protecziun civila turitgesa e lavura aschia era alla plazza aviatica, ha organisau per nus ina guida tut speciala ellas catacumbas da quei grond menaschi. Suenter ver passau la controlla usitada, essan nus serendi tras zulers e tunnels e vein priu investa dil sistem da sortir bagascha, la preparaziun dils aviuns, vein obteniu biaras informaziuns ed essan il davos setschentai directamein silla ramp per contemplar ils aviuns e la preparaziun da quels pli datier. Impressiunont ei la setschentada d’in aviun A380 stauda, buc il davos era da veser aschia il pli grond aviun dil mund a fetg cuorta distanza. Igl aviun ei vegnius da Shanghai, ha fatg staziun a Turitg per continuar la medema sera encunter Johannesburg. 

Suenter duas uras spassegiar per la plazza aviatica entuorn vein nus lu era giu fom ed ei ha dau carn stagliada a moda turitgesa. En buna atmosfera essan nus sentupai cun nos camerats da Turitg. La sera vess saviu cuzzar ditg, mo cunquei che l’auter di pareva da daventar pli stregns, essan nus serendi ad Andelfingen el center da scolaziun pils pumpiers, polizia e schurmetg civil, nua che mintgin ha saviu retrer sia combra e ruassar. 

Fiug e fem igl entir di

La damaun ha ei giu num levar baul. Gia allas 07.15 uras ein tuts stai semtgai sil plaz e major Heier Wipf ha fatg beinvegni a nus. Igl emprem ha ei giu num sescumiar e s’equipar endretg. Lu essan nus serendi egl „atelier da fiug“, ina stanza per simular tuttas facettas dil flashover (punct decisiv enteifer il svilup dil fiug). Instructur Arno Schuoler, oriunds da Mustér, ha declarau e demonstrau tut ils pass e mussau co giudicar ils indezis da fiug e fem. Impressiunonts ei segir era il mument staus nua ch’ils participonts han sentiu la temperatura da 1000° C e viu nua ch’ils cunfins dalla vestgadira e da nies equipament modern ein. 

Mo lu ha ei giu num luvrar e cumbatter fiug en differentas situaziuns. Nus vein empriu co ir entuorn cun lingias pli liungas sut pressiun, viu divers sistems da s’avanzar, mo era co stizzar il pli effectivamein il fiug. In secund eveniment pli grond ei il barschament da dus autos en ina garascha sutterrana staus. Quel ha pretendiu buca mo dils participonts, mobein era dils instructurs tutta concentraziun. En ina garascha sutterrana, emplenida da fem spess, dus vehichels che brischan e produceschan calira, plirs impediments ch’ein enta peis, ha ei num mantener las gnarvas e far la lavur bein ponderau. Buca mo ils pumpiers, mobein era tut igl equipament vegn en ina tala situaziun spert alla limita.

La sera eran tuts staunchels, mo era cuntents. Il di ei staus stregns, empriu vein nus bia ed era saviu empruar ora bia. Cunzun il contact direct cun fiug, fem ed aua ei staus impressiunonts, ha denton era schau anavos fastitgs da fulin e tschendra. Il di da scolaziun ad Andelfingen ei franc staus ina buna scolaziun per la lavur sco pumpiera e pumpier e tuts presents han saviu seprofitar. Il cuntegn pils discuors sin viadi anavos enucnter casa han perquei buca muncau e franc restan ils dus dis en buna memoria.

Fotos. Fabian Manetsch e Gion Tenner

1-4-2017. La fin mars ha il cuors da meinagruppa organisaus dalla GVG giu liug el Center da scolaziun Pantun a Tusaun. Da vart dils Pumpiers Sursassiala han Robin Flury e Sandro Tomaschett absolviu il cuors cun success.

Ferton ch‘ils dus giuvens han retschiert ils 11 da mars in‘emprema introducziun entras ils instructers, ha ei la fin mars giu num da sez vegnir activs. Duront ina jamna fetg intensiva e buca meins interessanta han els saviu engrondir lur savida arisguard il mistregn da pumpier e rimnar beinenqual experientscha en caussa. En quei grau astgan segiramein il container da flashover, la casa da fiug, sco era il carr da schurmetg da flad cun siu parcours vegnir menziunai sco experientschas marcantas. Mo era ils ulteriurs posts han purschiu als pumpiers ina pluna pusseivladads d‘emprender.

Da l‘autra vart han nos dus pumpiers era saviu emplenir lur sacados cun ina pluna informaziuns partenent la funcziun da meinagruppa. Suenter entgins inputs didactics e metodics ha ei valiu preparar duas lecziuns sur sesez e da silsuenter menar atras quellas culla gruppa. En quellas ei vegniu valetau, schebein ils futurs meinagruppa disponan dallas premissas pretendidas per lur incarica. Tier nos dus representants ei quei legreivlamein stau il cass, aschia ch‘els ein vegni relaschai il venderdis sera a Tusaun sco novs meinagruppa. Cordiala gratulaziun!

Fotos: GVG

1-10-2016. Mintga dus onns ston las basas per intervenziuns ABC far in cuors da repetiziun e perfecziun. Aschia tucca ei era a nus da serender a Domat sigl areal dalla fabrica. Suenter in cuort beinvegni entras il cumandant da cuors Rolf Brot, spetga gia Daniel Stefanelli sin nus e repeta cun nus co decontaminar correctamein. Il cuntegn dalla lecziun duvrein nus gest tier Rolf Schläpfer che  ha inscenau ina havaria cun chemicalias. Special vid il cuors ei che nus exercitein cun veras chemicalias enstagl da mo aua colurada. Cheutras savein nus era duvrar nos apparats da miserar. Capeivel ch’ei ha num luvrar exact e bein, pertgei in daguot dasperas sa ver nauschas consequenzas. Suenter gentar essan nus tier nies instructur Pierino Bisquolm che ha preparau plirs tests en connex cun sablun per ieli. Nus empruein differents products e mirein ils effects positivs e negativs. Lu envida Joachim Maigutt ad in referat davart intervenziusn A e B. Cunquei che nossas basas secloman ussa centers d’intervenziun ABC, stuein nus era sedar giu cun prighels dallas classas A e B. Tier Daniel va ei vinavon cun gas che sortescha en ina casa. Era quei problem sto vegnir sligiaus senza caschunar explosiuns. Tier il davos post vegnan ils novs vehichels ABC dalla fabrica da Domat e dalla GVG presentai. Beingleiti vegn numnadamein era nies vehichel che ha vargau 30 onns a vegnir remplazzaus ed aschia vein nus gia in’idea tgei che spetga sin nus. Il cuors ei staus interessants e segir han tuts saviu seprofitar. Cun in sacados empleniu e preparai per il proxim alarm returnein nus cuntents a casa. Cordial engraziament als instructurs per lur engaschi!