24-8-2021. La tiarza jamna d’uost ha nies pumpier Sandro Tomaschett frequentau il cuors da meinacziun e cunquei terminau sia scolaziun sco instructur. Il cuors bein organisau ha giu liug a Mendrisio da bialaura e temperaturas pulitamein cauldas. L’entschatta ella jamna fetg interessanta ed intensiva han ils participonts dau cugl exercezi „firefox“; ina catscha da zenslas atras Mendrisio cun differents pensums en connex culs pumpiers. Duront las lecziuns dils participonts han tut ils presents saviu profitar dalla savida dils collegas da classa e consequentamein era saviu approfundir ed amplificar lur savida arisguard las tschun fasas d’intervenziun ed il ritmus da menar. Plinavon ei era la metodica vegnida reflectada e discussiunada – in punct central pils instructurs. Ultra da quei program ei vegniu absolviu differentas percuorsas partenent l’enconuschientscha da baghetgs, il ritmus da menar e metodas dad intermediar ils temas suranumnai. Aschia han ils participonts saviu emplenir lur sacados di per di cun ina pluna savida dil fatg e metodica. Il punct culminont dil cuors ei staus la gievgia. Quei di ha mintga classa astgau preparar e menar atras in exercezi en fuorma da seracass per corps da pumpiers dalla regiun. La classa 4 ha preparau dus seracass (accident da traffic e barschament d’in ladretsch) pils pumpiers da Cadenazzo. Igl exercezi ei gartegiaus cumpleinamein ed ils 11 pumpiers da Cadenazzo han mussau oreifer engaschi, han luvrau ruasseivlamein ed efficientamein. Naturalmein ha ina spaghettata buc astgau muncar suenter igl exercezi. Per finir ha la classa aunc scret in feedback als pumpiers da Cadenazzo. Suenter il discuors da qualificaziun ed in apèro han ils participonts allura astgau turnar a casa cun ina pluna savida ed impressiuns positivas. Cordial engraziament al corp da pumpiers Mendrisiotto pil cuors organisau stupentamein!