Ils 7 da fevrer 2013 ha ina gruppa dils Pumpiers Sursassiala giu la davosa caschun da visitar il tunnel dalla NEAT. Cun nos dus guids Matthias Wisniewski e Reto Monn, ils davos representants dils pumpiers dil menaschi, essan nus serendi ellas profunditads. El decuors dallas proximas jamnas vegn igl ascensur demontaus per far plaz al niev ascensur d‘urgenza che vegn lu ad esser en funcziun la fin digl onn. Il viadi ella ruosna ei buca mo staus divertents, mobein ha cunzun surviu a nus per survegnir in‘impressiun da quei che spetga nus el futur. En ina fuorma aunc buc definada vegnan ils Pumpiers Sursassiala ad esser responsabels per la segirtad dalla part miez, vul dir la staziun multifuncziunala. Nies viadi ha menau nus gest atras quella staziun e spert ei stau clar che quei vegn buc ad esser sempel da s‘orientar giu leu en quei labirint da tunnels e gallarias. Nus astgein gia oz esser spannegiai tgei che spetga sin nus. Fin mars 2013 vegn Matthias Wisniewski a bandunar Sedrun e surdar siu post da cumandant a Reto Monn. Naven da quei di surprendein nus dapli engaschi sil plazzal entochen che Reto Monn banduna medemamein il plazzal. Quei mument croda igl entir menaschi puspei anavos als Pumpiers Sursassiala. Il termin ei fixaus sin fin 2013, sa denton gia esser pli baul. Actualmein contraheschan las Viasfier federalas cul Cantun davart il futur dil tunnel e co in‘intervenziun vegn reglada. Gia oz savein nus dir ch‘ei vegn a dar in pensum per nus – la fuorma ei denton aunc libra.