Niev equipament persunal

La segirtad persunala da nos pumpiers ha pitiu levet ils davos onns. Buca ch’ei fuss stau prighel per la persuna, denton piteva il resti persunal dalla vegliadetgna. Pliras giaccas e caultschas dateschan numnadamein gia da 1999, zatgei aunc pli vegl. Il resti vegl ha buca mo fatg atras plirs barschaments, mobein las fasras ein daventadas diras e rumpeivlas entras la vegliadetgna. Aschia saveva il resti buca pli ademplir sia funcziun. Entras la fusiun da 2009 ha ei dau in entir sortiment da giaccas e caultschas. Gest sis models, senza quintar las garnituras privatas da bein enqualin pumpier, ein stai en funcziun. E malgrad tonta varietad muncavan savens grondezias e nus vein stuiu cumprar suenter niev resti. Perquei vein nus fatg in concept per in niev equipament persunal ch’ei entraus en vigur cun 2013. La furniziun previda per la fin schaner ei denton gia arrivada ed aschia ha igl emprem tierz dils pumpiers astgau retscheiver il niev resti persunal sin l’entschatta digl onn. L’elecziun da niev resti da pumpiers ei ozildi buca sempla. Aschia han otg furniturs astgau presentar lur products. Nus vein evaluau da rudien e cumparegliau, tratg en meinis da specialistAs e dumandau auters pumpiers davart lur experientschas. Treis products ein restai tochen alla fin ed era nos pumpiers han giu la caschun da prender posiziun. Risguardond ils novs reglaments ed il futur vein uns elegiu il product dalla firma Rosenbauer, il model Fire Max II. La sempladad e la buna qualitad ha perschuadiu nus tuts. Il temps vegn a mussar schebein l’elecziun ei stada buna ni buc. Segiramein savein nus rapportar pli tard surdlunder.