Per informaziun – el hotel ha ei buca barschau, mo cun igl alarm d’exercezi 2003 havein nus simulau in barschament el hotel “Disentiserhof”. Las finamiras ein stadas multifaras, tuts pumpiers ein vegni dumandai ed ein stai occupai tochen alla davosa minuta. Finamira principala han las deliberaziuns da persunas giu, in diember da persunas fetg ault per in exercezi, denton realistics en vesta d’in seracass serius. La situaziun

En ina stanza dil hotel rumpa ora in fiug, quel sederasa el zuler. La producziun da fem e gas tussegau entras ils teppis ei enorma. Il fem sederasa en ina part dil hotel. Ils biars dils hosps vegnan da fugir. Treis persunas sisum il hotel scappan sin il balcun ed ein leu serrai en dil fiug e fem. Pliras persunas anflan buca las sortidas d’urgenza e piardan la schientscha el fem els zulers. Il diember da quellas persunas ei all’entschatta buc enconuschents.   L’entira acziun vegn tgamunada da plt Florentin Tenner. Sia decisiun:  liberaziuns dallas persunas els corridors liberaziuns dallas persunas sils balcuns tener las parts dil hotel buca donnegiadas dil fiug e fem stizzar  Ils mieds

per cuntonscher las finamiras stattan a disposiziun:  39 pumpiers, da quei 10 schurmetg da flad in auto da pressiun ina scala mecanica pliras scalas da prolungaziun ina sprezza a motor  L’alarmaziun dils pumpiers succeda entras SMT allas 20.08 uras. 9 minutas pli tard ei igl entir corp da pumpiers sil plaz ed en acziun. La secziun dil schurmetg da flad surpren la deliberaziun dallas persunas enserradas els corridors, la secziun dalla scala mecanica deliberescha las persunas sils balcuns. Las partiziuns digl ADP e dalla sprezza a motor procuran per l’aua da stizzar il fiug. Ina lingia da furniziun traversa la via cantunala e procura aschia per problems da traffic che ston medemamein vegnir sligiai.   Conclusiuns

La lavur dils pumpiers ei stada fetg buna. Entgins puncts ston aunc vegnir migliurai e pertuccan la furniziun d’aua. La lavur dallas secziuns schurmetg da flad e scala mecanica ei stada exemplarica. En in seracass basignassen nus denton igl agid dil schurmetg da flad dallas vischnauncas vischinas per saver encurir giu pli spert il hotel. Igl exercezi ha mussau ch’il corp da pumpiers ei sin in fetg bien stan. Tier in alarm ein buca tuts pumpiers ella secziun usitada. Tuttina han els mussau ch’ins sa duvrar els dapertut. Agl exercezi ha era l’Uniun samaritana Mustér priu part. Lur engaschi ei medemamein staus fetg buns, cunzun ein els arrivai fetg spert sil plaz. Era cheu funcziunescha uss la coordinaziun cun il commando dil plaz fetg bein.   Remarca Hotel Disentiserhof In seracass el hotel sco exercitau ei bein realistics, denton strusch pusseivels. Ils motivs schaian vid la buna infrastructura pertuccont segirtad da fiug e cunzun era vid la peisa che tala protecziun ha el hotel. Il persunal vegn scolaus onn per onn co sedepurtar en cass da fiug. Directur Ueli Stümpfig metta gronda peisa sin la segirtad da ses hosps. El cun siu entir team meretan cheu in laud special.   Engraziament Ch’igl exercezi ei gartegiaus ei d’engraziar allas suandontas persunas:  signur Ueli Stümpfig, directur Hotel Disentiserhof signura Letizia Schmed, preparaziun dils pazients ils pazients: Claudia Wenzin, Letizia Schmed, Adrian Lutz, Christoffel Giger, Riccardo Manetsch, Leci Decurtins mintga singul pumpier participau al team dil hotel (cuschina) per il bien refrestg offerius dil hotel    Text e fotos: Gion Tenner, cdt Pumpiers Mustér