Venderdis e sonda, ils 28 e 29 da mars 2003 han giu liug a Trun ils usitai dis da scolaziun per ils officiers, quella gada sut il tema per nus fetg actual: donns elementars e seracass gronds. Major Augustin Calivers (Laax) ha ensemen cun ils instructurs Cristian Demont (Rueun), Urs Pauiln (Glion), Fritz Steinmann (Laax) e Stefan Rottensteiner (Tavau) semtgau in stregn, mo interessant program per ils dus dis. Il cuors ha entschiet cun in referat da dr. Markus Fischer (Segirada da baghetgs cantunala) cun il tema: seracass elementars ord vesta dalla segirada da baghetgs. El ha mussau las breigias che nies cantun fa onn per onn per prevegnir als donns. Ils pumpiers vegnan supplicai da segidar cun la populaziun ella cussegliaziun. Finamira seigi che mintga vischin seigi pinaus sin il proxim seracass en consequenza da malauras. Vischinas e vischins han la pusseivladad da seschar cussegliar entras ils pumpiers davart las mesiras che ston vegnir pridas per schurmegiar lur fatg. Ils pumpiers mettan ensemen cun la segirada da baghetgs a disposiziun gratuitamein sacs da sablun. Suenter il referat vein nus luvrau en gruppas e sin differents posts davart ils temas: sacs da sablun (funcziun dalla maschina d’emplenir), seracass d’aua, neiv e lavinas, bovas, evacuaziuns, construcziuns d’urgenza. La sonda ei stada reservada als plans da seracass. La finamira ei da crear per obejcts/loghens cun prighel special per persunas, animals, rauba ed ambient plans da seracass, quei ton pli spert. Ils plans duein survir tier in seracass sco basa d’informaziun. Plianvon han ils instructurs mussau co ir entuorn cun las medias, co reagar tier in cass d’antrax, co organisar exercezis da cader regiunals e la funcziun d’ina aquaduct.