25-1-2003. Sut il commando da mai Augustin Calivers, inspectur da pumpiers dil district 6, ha giu liug sonda, ils 25 da schaner 2003, in cuors d’introducziun per pumpiers novizs dallas vischnauncas da Tujetsch e Mustér. 19 pumpiers giuvens ein stai presents. Els ein vegni instrui dils instructurs cpt Christian Demont e cpt Urs Paulin.

Il cuors ei gia il secund, mo pli probabel era il davos che vegn fatgs per ils novizs specialmein a Mustér. Il motiv ei ch’ils Pumpiers Mustér han da recrutar pli bia persunal che usitau, 16 persunas ein necessarias per contonscher igl effectiv giavischau.

Sco menziunau ei l’emprema gruppa vegnida instruida da cpt Urs Paulin. La scolaziun dad els ei vegnida fatga per tudestg era ord risguard visavi in pumpier da lieunga tudestga.

La secunda gruppa sut l’instrucziun da cpt Christian Demont ei vegnida instruida per romontsch (ina raritad en vesta dils paucs instructurs romontschs el district). Ad ella han era quater pumpiers da Tujetsch priu part.

Ils pumpiers ein vegni confruntai cun las lavurs ed ils pensums da basa, caussas che mintga pumpier sto saver avon che serender vid uaffens e pensums specials.

La damaun allas 08.45 uras ha mai Augustin Calivers fatg beinvegni als presents. El ha menziuanu las finamiras dil cuors e declarau cuortamein ils pensums d’in corp da pumpiers modern d’ozildi. Stizzar fiug seigi mo ina pintga part dalla lavur dils pumpiers (20%). Oz seigi il pumpier confruntaus cun tut auters problems, naven digl accident da traffic entochen alla havaria d’ieli ni chemia.

Ils instructurs han declarau als pumpiers tgei ch’ei drova per ch’in fiug sappi insumma barschar. Indirectamein han els aschia era gest mussau las pusseivladads da stizzar in fiug, senza entrar sin tecnicas e tacticas.

La part teoretica dall’entschatta ei bein stada impurtonta, mo ha buca pudiu tschaffar tuts. Pér la pratica silsuenter vid il hidrant, las sugas, la scala e la barella han dau ina bun’investa davart la lavur dil pumpier.

Ils pumpiers han empriu d’enconuscher tschun differentas sorts da lingias, da baghegiar si ina lingia da pressiun, da metter en funcziun in hidrant e da far sempels nuvs per liberar sesez ni autras persunas.

Pli pretensius ei la liberaziun d’ina persuna cun agid da scala e barella stada.

Da tut temps ein ils pumpiers vegni susteni dils dus instructurs aschia ch’igl ei gartegiau a mintgin da far ils pensums pretendi.

Forsa che beinenqualin ei sesentius curios en mondura e vid uaffens meins usitai, forsa ch’era enqualin ha fatg patratgs tgei impurtont pensum ch’ils pumpiers han insumma. Aunc ein ils exercezis stai plitost in fuffergnadi. Cu ei vala per propi negin che sa.

Alla fin dil di survegnan tuts in diplom dil Cantun ed ina mappa cun las caussas impurtontas dil di. Ussa ein ils pumpiers pinai per entscheiver lur lavur specialisada enteifer las differentas secziuns dils corps.

Tschappar en da cuminonza – quei ei in bi motto per ils pumpiers, pertgei ensemen essan nus pli ferms. Quei ha il cuors puspei mussau inagada dapli, cunzun era entras la participaziun da dus corps vischins. Ch’igl ei gartegiau fetg bein engraziein nus ad Augustin Calivers, Christian Demont ed Urs Paulin, mo era a Hansueli Roth che ha lubiu da menar atras il cuors.

Ils pumpiers da Mustér e Tujetsch ein puspei pinai per la proxima acziun!