Gia daditg sil program – ussa aschi lunsch: ils 7 da mars 2003 vegn la gruppa dil salvament sin via (SSV) instruida en ina part teoretica dil cau dil post da polizia cantunala Mustér, signur Felici Deflorin. Pli tard suonda ina part pratica sin via. L’emprema part tracta l’inquisiziun tier in barschament. Enconuschentamein posseda era la polizia cantunala specialists per barschaments che san vegnir clamai sil plaz per eruir ils motivs d’in incendi. Per che lur lavur sappi succeder il meglier pusseivel, dependa ei tgei ch’ils pumpiers fan per stizzar il fiug. Disfan els mussaments, daventan las retschercas dils inquisiturs pli greva tochen nunpusseivla. In secund capetel pertucca la sirena e la cazzola blaua. Ils dus mieds che vegnan da principi adina duvrai ensemen, lubeschan allas organisaziuns polizia, pumpiers e sanitad d’arrivar pli spert al plaz da seracass. Damondas sco: nua han ils mieds in senn? co ston els vegnir duvrai? ein vegnidas discussiunadas. Il pli impurtont punct en quei connex ei denton la segirtad da tuts pertuccai. Savens reageschan automobilists e pedunzs faliu cu els audan sierenas e vesan cazzolas blauas. Perquei ston autists da tals vehichels gest esser il dubel attents per buca caschunar sezs accidents. En quei connex han las treis organisaziuns da cazzola blaua da nossa regiun era in grond giavisch a nos vischins: cazzola blaua e sirena muntan da dar liber immediatamein la via. Ord experientscha fatga ei quei negin problem tier persunas jastras, nossa glieud enconuschen forsa memia pauc quella situaziun e bloccheschan savens la via, nunsavend tgei far. Segirar il plaz d’accident. Quei ei per nus pumpiers che luvrein sin via fetg imputont e sa spindrar veta. Il dretg e correct diever dils mieds leusuenter (heighels da molan, triopan, sbrinzladers) ston vegnrir exercitaus ed instruius exactamein. Plazs da lavur ston vegnri segirai en mintga cass, era tier exercezis. Dasperas suonda era il reglar il traffic cun segns corrects e beinveseivels. Quella lecziun vegnan ils pumpiers ad absolver era ella pratica sin la via dil Lucmagn ils 24 d’avrel e pli tard els exercezis. ils manischunzs digl ADP ein cunzun stai interessai davart als informaziuns pertuccont la lubientscha da carrar cat. C1. Per ils pumpiers che possedan gia quella lubientscha semida praticamein nuot, auter ch’ina controlla dil miedi mintga tschun onns. Per novs pumpiers en quella secziun ei in examen ella categoria D (nies ADP ei sur 7.5 tonnas) necessaris. Ils cuosts colligiai leutier ein considerabels, las autoritads communalas vegnan a stuer sefatschentar da quella caussa. Il prighel da survegnir negin el futur ch’absolva quella scolaziun ei gronds. Sper ils cuosts occuora numnadamein era ina gronda investiziun da temps. Il protocol d’accident european gidan en cass d’accident da lugar pingns donns. Nies referent muossa cuortamein co quel funcziunescha. Signur Deflorin beneventa e sutlingescha las mesiras pridas en connex cun parcar ad Acla da Fontauna. Medemamein menziunescha el era il diever da nossas tablas “Pumpiers en acziun” ch’ein ina fetg buna caussa cunzun per avertir ils ulteriurs autists da prender risguard, seigi quei cun schar vargar ni cun schar la precedenza. Las tablas lubeschan denton buca da buca setener vid las reglas da traffic. La part teoretica ei a fin ed ha purtau bia. Certas caussas ein stadas ina buna repetiziun, autras caussas ein novas che ston adina puspei vegnri refrestgentadas. Per il grond engaschi ed era per il temps mess a disposiziun engraziein nus perquei a signur Deflorin. La collaboraziun Pumpiers Mustér cun polizia cantunala ei fetg buna. Forsa vein nus cheu igl avantatg d’esser ina regiun surveseivla. Il sutegn vicendeivel promova denton la collaboraziun e nus essan segirs che quella resta era pil futur.