Pégna scalegl dil construider da pégnas Giger SA a Sedrun, model Péz Greina Pégnas scalegl ein d’anflar praticamein en mintga casa sursilvana. Era ils davos onns gauda la pégna enconuschenta dapi il 18avel tschentaner buna accoglientscha. Deplorablamein dat ei adina puspei incendis en connex cun tals scaldaments. Per evitar tals, anfleis Vus cheu sut entgins cussegls:  Duvrei mo buna lenna da scaldar, pia lenna bein sechentada e naturala. Era brichets ein pusseivels. Grond donn vid la pégna ed il tgamin caschunan en tutta cass autras materialias sco lenna tractada, plastic, rumien ni ielis. Talas substanzas ein plinavon scumandadas en pégna e san caschunar in castitg considerabel. Per dar fiug saveis Vus duvrar in tec pupi, stialas ni mieds specifics per far quei. Nus discussegliein en mintga cass da duvrar petroli, spiritus ni benzin. Arver all’entschatta tut las siaras d’aria levgiescha il dar fiug en pégna. Buca surcargar la pégna cun memia bia lenna ni memia gronds tocs. Cass cuntrari sefuorma fulin glischont che sa caschunar barschaments dil tgamin. Duront ch’il fiug brischa tener aviert las ventilaziuns aschia che la lenna brischa regularmein. Mai cuvierer burnida cun lenna nova, il prighel d’explosiuns da gas ei gronds. Serrar las siaras e ventilaziuns diltuttafatg pér cu il fiug ei stizzaus diltut. Mai cuvierer ruosnas da ventilaziun. Tener avunda distanza dalla pégna e material che sa barschar. Mai cuvierer ni metter sin pégna material che sa barschar. Tener ina buna distanza da segirtad. Risguardar en mintga cass il manual dil construider da pégnas. Schar controllar e schubergiar la pégna regularmein entras il spazzatgamin (obligatori).