Calira e fiug: survient ed inimitg! Fiug ei in element primar. Il carstgaun sesurvescha dil fiug gia da vegl enneu, ha denton savens breigias da tener el a mistregn. Fiug sco fontauna da calira che renda in’atmosfera emperneivla en stiva sa fetg spert semidar en ina bestia nuncalculabla. Mo savens vegnan era autras fontaunas da calira sutschazegiadas el tenercasa. Surfatschas cauldas, liquids e parts d’apparaturas san caschunar grevas blessuras e schizun era incendis.   Controllar calira e fiug Sch’ins survigilescha buca calira e fiug, daventan els spert malsegirs. Tgi che vul nezegiar quels dus elements sto enconuscher ils prighels. En emprema lingia vul quei dir separar materialias che brischan tgunsch da fontaunas da calira e fiug. La distanza sto esser aschi gronda sco la dinamica dil fiug pretenda. Fiug e flommas fascineschan cunzun affons ed intimeschan els da giugar. Perquei che affons enconuschan buca ni memia pauc ils prighels san las consequenzas esser graviontas. In sedepurtar correct, installaziuns segiras e buns mieds gidonters gidan da minimar ils prighels.