Rapport e fotografias: Poca GR/CI Sursassiala

17-10-2023. Mardis avon miezdi ei in auto barschau cumpleinamein sut Cumpadials sper la punt dil Rein. Il manischunz ha saviu bandunar igl auto saunamein ed ei silsuenter serendius en segirtad.

Il manischunz da 72 onns ei carraus il mardis cuort avon las 11.15 uras da Cumpadials encunter Surrein. Datier dalla punt dil Rein constatescha el ch’il motor piarda forza ed entscheiva a ruchegiar. Sin fundament da sia constataziun retegn el sin in parcadi ed emprova da metter danovamein en funcziun siu vehichel. Immediat percorscha el fem che sortescha dil motor. El banduna igl auto e vesa las empremas flommas sut igl auto. Senza retardar telefonescha el alla centrala d’alarm dalla polizia cantunala a Cuera. Malgrad la sperta intervenziun dils Pumpiers Sursassiala gartegia ei buca dad evitar ch’il vehichel brischa diltuttafatg. Entras la calira vegn in ulteriur auto parcaus ella vischinonza donnegiaus. In emploiau digl uffeci per ambient e natira ha giudicau il plaz da seracass. Il funs dil parcadi, sco era parts dil terren contaminai entras ielis ed aua da stizzar ston vegnir allontanai e dismess silla deponia speciala. La polizia sclarescha il decuors digl incendi.

ll Center d’intervenziun Sursassiala ei staus cun 13 umens sil plaz. Ina gada dapli eis ei sepagau che la gruppa specialisada sin accidents ei medemamein scolada sin havarias ABC. Cunquei ch’il vehichel ABC era tuttina sil plaz, han contaminsaziuns cun l’aua dil Rein saviu vegnir impedi.