28-5-2016. Sogn Pieder manegia bein cun nus e porscha aura ideala per nies di d’inauguraziun dil niev autoscala e dallas portas aviartas. La glieud ei era vegnida en roschas: rodund 400 persunas han visitau nossa presentaziun. Allas 11.00 uras beneventa nossa presidenta Esther Koch tuts presents. Silsuenter suonda la benedicziun entras nos plevons sur Georg, sur Thomas e ser Roland, il qual presenta era gest il num Gada dil niev vehichel, la patruna dils pumpiers, denton era la patruna dalla baselgia ella vischinonza che duei esser stada baselgia da vallada per las pleivs da Medel, Tujetsch e Mustér, pia per gest quellas vischnauncas, las qualas han cumprau ensemen culla segirada da bagehtgs cantunala il vehichel. Markus Feltscher, directur dall’Assicuranza da baghetgs cantunala declara l’impurtonza dala basa da pumpiers Sursassiala. El spargna buca cun laud e sutlingescha l’impurtonza entras la menziunar las investiziuns fatgas dall’assicuranza ils davos onns ell’aletzia dad in milliun francs. El engrazia allas vischnauncas participadas e spera che las ulteriuras schazegien era il niev survetsch cun p. ex. pagar alla Sursassiala ina summa annuala corrispundenta. Markus Bigger dalla firma Rosenbauer presenta il niev vehichel e surdat silsuenter la clav da quel. Finida la fiasta d’inauguraziun suonda nossa presentaziun che succeda sin divers posts. La glieud ei fetg interessada e sesmarveglia per part tgei material, mo era tgei incaricas che nus vein. Per nus eis ei ina buna caschun d’emprender d’enconuscher anteriurs pumpiers che raquentan da lur lavur, mo era da vegnir en contact culla populaziun. Aschia astgein nus serrar il di spir cuntentientscha, mo era digna luschezia dil cuntonschiu. Cordial e sincer engraziament! En num dils Pumpiers Sursassiala engraziel jeu alla Assicruanza da baghetgs cantunala ed allas treis vischnauncas per l’investiziun. Specialmein admettel in grond engarziament a miu cader che ha realisau quei di a moda exemplarica. jeu engraziel als augsegners, alla firma Rosenbauer ed a tuts hosps e visitaders per lur presenza.
