Tscheiver ha tier nus ina liunga tradiziun. Duront plirs dis vegn propi fatg fiasta e mintga liug ha siu tscheiver. Deplorablamein dat ei mintga onn era accidents che stuessen buc esser. Perquei cheu entgins cussegls da nossa vart co il tscheiver sa vegnir festivaus senza incaps:  Alcohol ed ir cun cun auto van buc a prau. Perquei vala sco adina: tgi che va cun auto beiba nuot! Alcohol duei vegnir consumau cun mied e mesira. Onn per onn sespiardan persunas e vegnan anfladas casualmein zanua. Il prighel da sedurmentar zanua el zuppau ei gronds. Problems caschuna lu cunzun la ferdaglia che sa ver nauschas consequenzas. Rachettas e fiugs bengals s’audan en mintga cass buc en in til da tscheiver. Il prighel da blessar autras persunas ei memia gronds. Decoraziuns ston esser ord materials che san buca barschar, cunzun en locals publics. Buca schar arder candeilas senza survigilonza. Era costums san barschar! Costums da vatta e nilon brischan zuar buc, liuan denton e san caschunar grevas blessuras. Buca cuvierer cazzolas cun pupi ni teilas. La calira sa metter en fiug quellas. Sortidas d’urgenza ein da tut temps da tener libras ed era aviartas. Ellas surveschan buca mo sco liug da fuigia, ils pumpiers drovan las portas sco entrada per porscher agid. Cazzolas blauas e sirenas han in’attracziun magica tier persunas sut alcohol. Mo sil pli tard cu tals vehichels ein sin via dat ei zanua problems ed ei fa prescha. Igl ei buca prudent da semetter a mesa via e da star enta peis en talas situaziuns.  Nus giavischein a tuttas e tuts in bi ed emperneivel temps da tscheiver!