9-5-2020. Sin in balcun dad ina casa da pliras habitaziuns a Sedrun rumpa ora in fiug entuorn las 13.00 uras. Il fiug attacca spert la fassada dalla casa e la stiva ella vischinonza. Vischins constateschan il fem ed alarmeschan immediat ils pumpiers. Suenter mo 4 minutas ei igl emprem element gia sil plaz ed ei reussescha als 21 pumpiers, cun agid digl autoscala ed in trup egl intern dalla casa, da stizzar il fiug. Grazia ad in ventilatur ed umbrivals da fem reussescha ei dad impedir ch’il fem sederasa en zuler ed ellas ulteriuras habitaziuns. Ils cussadents han saviu vegnir evacuai entras ils vischins aschia che negin ha pitiu donn. Gia suenter duas uras han els saviu returnar en lur habitaziuns. La habitaziun pertuccada ei inhabitabla ed ils donns vid balcun e stiva ein gronds. Il motiv dil fiug vegn sclarius entras la polizia cantunala.