2-6-2018. La fin matg surdat la firma Zugerland Technik SA nies niev vehichel da commando. Era sch’ei drova aunc pintgas adattaziuns sa il niev vehichel vegnir duvraus pil seracass. Ils construiders dil vehichel, che possedan bia experientscha ella construcziun da vehichels da polizia e sanitad, han creau in vehichel special adattau a nos basegns: d’ina vart eis ei pusseivel da transportar persunas, da l’autra vart survescha il vehichel sco post da commando mobil. La communicaziun stat el center ed aschia cuntegn il vehichel sper las colligiaziuns da func (analog, digital, Polycom) era in acces agl internet. Dus plazs da lavur cun computer lubeschan al stab d’intervenziun da procurar per las informaziuns necessarias. Aschia ei il vehichel prompts per la digitalisaziun che daventa adina pli impurtonta era tiels pumpiers. Grazia al current electric staziunar ed independent sa il vehichel vegnir duvraus dapertut. Crunas ella part davos dil vehichel dattan la pusseivladad da transportar il material necessari. Quellas ein fatags aschia che caussas impurtontas ein accessiblas ton davos sco era digl intern dil vehichel. Sper las installziuns usitadas posseda il vehichel era ina illuminaziun da LED aschia ch’ina illuminaziun externa ei buca pli necessaria. Il remplazzament sfurzau ei igl emprem pass dil concept da vehichels 2018-2024. Igl atun suonda il niev camiun ABC ed en strusch in onn lu il niev auto-cistiarna. La suradada ufficiala dil niev vehichel da commando succeda en ca. 2 jamnas suenter che tuttas lavurs ein terminadas. Dapli informaziuns davart il vehichel anflas Ti cheu.