da Pierino Bisquolm
Ils 2 d‘october ha giu liug a Fideris en Purtenza l‘emprema concurrenza da schurmetg da flad. Igl intent d‘ina tala ina concurrenza ei da s‘entupar cun auters corps da pumpiers, tgirar buns contacts cun collegas e promover l‘activitad dils pumpiers ordeifer il survetsch usitau.
Quella caschun havein nus dils Pumpiers Sursassiala buca vuliu munchentar ed essan era s‘annunziai – per l‘emprema gada en nossa historia insumma – cun gest duas gruppas à tschun persunas. La generaziun la pli giuvna da nos pumpiers ensemen cun quaters pumpiers pli avanzai ei immediatamein stada prompta da separticipar a quella occurrenza. Cunquei che la savida e la scolaziun eran aunc buc aschi avanzadas sco tier ils pumpiers ch‘ein pli ditg en survetsch, havein nus aunc fatg enqual sera exercezis supplementars per trenar e migliurar tecnicas ed intervenziuns.
Buca tuts han giu in‘aschi ruasseivla notg avon il campiunadi, denton in tec nervusadad s‘auda gie vitier. Mo tuttina eran tuts frestgs e bein motivai la sonda endamaun cura ch‘ei ha giu num parter baul naven da Mustér e Sedrun per arrivar ad uras a Fideris. Arrivai el liug vein nus immediat semtgau nos apparats e fatg ina davosa controlla. Spanegiai eran nus schon, cunzun suenter ver viu tgi che cumbatteva quei di encunter nus. Nies motto ei denton staus: dar tut e far il meglier ordlunder! E quei ei era gartegiau.
Tschun posts caschunan rumpatiasta
En tut eis ei stau da frequentar tschun differents posts cun divers pensums. Agl emprem vein nus stuiu encurir en ina stanza quater persunas. Cunquei ch‘ins veseva insumma nuot, ei quei buca gest stau in sempel pensum. Igl exercezi vegn dalla pratica nua ch‘ils pumpiers ston savens entrar en stanzas da fem e stgiraglia senza veser zatgei. Sil post eis ei vegniu controllau con bein che la gruppa luvrava ensemen, sch‘ella observava ils dretgs camonds e possedeva ina buna communicaziun enteifer la gruppa.
Tier il secund post eis ei stau da spindrar in dils agens pumpiers. Igl ei vegniu simulau ch‘in pumpier ella gruppa seigi tuttenina senza schientscha ed ei seigi necessari da spindrar el aschi spert sco pusseivel ord in carr annex d‘in camiun. Naturalmein ch‘ils organisaturs vevan pinau entginas schicanas ed ins stueva surmuntar differents impediments. Plinavon ei era igl emprem agid buca vegnius negligius. Tenor tuttas reglas ei il pazient vegnius transportaus spert el liber.
Al proxim post havein nus stuiu stizzar in fiug en ina stanza. Suenter haver retschiert l‘incarica ha ei giu num prender ils uders e baghegiar ina lingia per saver attaccar e stizzar il fiug. Era cheu eis ei puspei buca stau sempel da vegnir tochen avon igl object. Mo era quei pensum vein adempliu cun bravura.
In dils stentus posts ei il quart staus, il qual ha pretendiu da nus tut il pusseivel. En emprema lingia mava ei cheu per il divertiment, denton eran ils differents pensums ualti stregns. Nus havein stuiu transportar aua en duas sadialas atras igl entir post. La finamira era da buca sfarlatar l‘aua, cunquei che quella vegneva duvrada alla fin per sittar sin ballas. Pli pauca aua – pli pintga la schanza! Ils pensums ein stai ualti difficils e quels havein nus stuiu sligiar aschi spert sco pusseivel muort la limita da temps. Bia liters suadetsch da pumpiers premurai ein pia culai dil Rein, respectivamein dalla Landquart giu.
Empau pli ruasseivels ei il tschunavel post staus, al qual che nus vein sulettamein stuiu sligiar in legn cruschau cun differentas damondas davart ils pumpiers. Cun nossa buna scolaziun e savida ei quei stau levet da sligiar.
La rangaziun
Tier la rangaziun ei la tensiun stada immens gronda. Mintgin era spanegiaus tgei plaz che seigi seresultaus suenter ton engaschi e bia suadetsch. La finamira da quei di ei sulettamein stau dad haver in bi di cun bia divertiment. Mo in bien plaz fuss schon era zatgei bi! La finfinala ha ina da nossas gruppas contonschiu il sisavel e la secunda il novavel plaz da total 26 gruppas. Secapescha che quei ei stau ina gronda surpresa ed il plascher nundescrivibels, tonpli ch‘ils megliers pumpiers derivavan da corps da pumpiers rutinai e da professiun. E loschs essan nus era dad haver dumignau beinenqual corp da pumpier da num derivont da Basilea, Berna ni Turitg. Beinenqualin dils presents ei staus surstaus da nossa buna prestaziun cun in team aschi giuven. La motivaziun, igl engaschi ed il plascher ein stai aschi gronds che nus havein gia decidu da puspei separticipar igl onn vegnent. E tgisà – forsa essan nus lu buca ils sulets Romontschs!
