Ils responsabels per fatgs da pumpiers dallas vischnauncas da Tujetsch, Medel/Lucmagn e Disentis/Mustér ein seradunai ils 16 da december ad ina seduta cun il menader digl Uffeci da polizia da fiug dil Cantun Hansueli Roth ed il cau dil district Augustin Calivers per discussiunar davart ina collaboraziun en fatgs da pumpiers denter las treis vischnauncas. Ils davos onns ein ils treis corps da pumpiers vegni decimai grondamein. Entras ils pli pigns diembers spargnan las vischnauncas cuosts, la scolaziun dils pumpiers sa vegnir optimalisada ed ils corps daventan pli efficients cunquei ch’els possedan meglier equipament. Tier in seracass pli grond vegn denton igl agid dallas vsichnauncas vischinontas basignaus. Per che quella cooperaziun funcziuneschi, drova ei in concept d’organisaziun ed alarmaziun regiunal. Las biaras vischnauncas el cantun Grischun possedan gia in tal concept. Las experientschas fatgas ein zun positivas. Per las treis vischnauncas sisum la Cadi ei il pass tier ina tala cooperaziun buca schi gronds, cunquei che cunzun Mustér e Tujetsch disponan gia dall’infrastructura necessaria, ni che quella ei planisada per 2000. Sulettamein la vischnaunca da Medel/Lucmagn stuess aunc far entgins sforzs finanzials per ademplir las premissas necessarias. Actualmein sepresentan ils effectivs dils corps sco suonda:       Vischnaunca effectiv da 60% corrispunda a cefras d’experientscha tier in alarm effectiv dils pumpiers

100%   Disentis/Mustér 36 60   Medel/Lucmagn 24 40   Tujetsch 30 50   Total 90 150 pumpiers        Ils diembers dils pumpiers ei fixaus tenor igl object che caschunass tier in seracass las pli grondas evacuaziuns. Il stan actual muossa che la vischnaunca da Tujetsch posseda – cun excepziun digl equipament persunal – tuttas premissas dumandadas. La vischnaunca da Mustér sto aunc acquistar igl indrez d’alarm SMT 750 ch’ei denton planisaus e gia offerius, aschia ch’il sistem vegn cumpraus igl onn 2000. La vischnaunca da Medel/Lucmagn ha aunc buca in sistem d’alarm SMT e posseda negins vehichels. Ina cumpra ei buca planisada per 2000. Era tier igl equipament persunal dat ei aunc largias. Ord la discussiun semuossa che las duas vischnauncas da Tujetsch e Mustér ein promptas per in agid vicendeivel. Ils responsabels da Medel han aunc buca ponderau aschi detagliadamein la caussa. Il sforz ei leu pli gronds, forsa gest perquei che en in ver seracass ein ils pumpiers da Tujetsch e Mustér tuttina obligai da segidar. Nus sperein denton che Medel sedecidi era per ina buna e stretga collaboraziun per saver garantir a tuts habitonts dalla Sursassiala in bien ed effectiv survetsch da pumpiers.