Gliendisdis Patgas, ils 17 d'avrel 2006, allas 04.10 uras annunzia in vischin da Mustér in fiug ella stalla dalla claustra a Salaplauna. Ina minuta pli tard contonscha igl alarm il pichet 1 dalla Basa da Pumpiers Mustér, allas 04.16 uras vegn igl entir corp da pumpiers alarmaus. 

Ils emprems pumpiers arrivan allas 04.17 uras sil plaz. La stalla gronda sesanfla en fiug cumplein, il baghetg annex brischa medemamein. Per las vias entuorn seglian vadials e vaccas, vischinas e vischins da Raveras e Vitg sesprovan da pigliar ils animals e da catschar ensemen els. La casa da habitar ei buca donnegiada, el nuegl dalla stalla vesan ins persunas che sesprovan da liberar ulteriurs animals. 

Immediat vegnan pumpiers en acziun per segidar cun la liberaziun dils animals e per tener naven ils vischins digl object. In'ulteriura gruppa segirescha la casa cun ina preit dad aua.





Finalmein vegn l'annunzia che la gronda part dils animals seigi el liber e cunzun che neginas persunas sesanflien pli en stalla. La preit d'aua fa siu survetsch ed ei strusch montada che la construcziun da fier dalla stalla lai suenter e l'entira construcziun sederscha encunter la casa da habitar. La preit d'aua fa denton bien survetsch e stezza il tablegiau. Era las duas lingias da segirtad san stizzar il fiug sin tetg-casa.





L'enorma peisa dalla construcziun da fier donnegescha la grunda-tetg dalla casa, denton aschia ch'ils donns ein internamein buca veseivels. Ussa ha ei num stizzar il fiug e cunquei ch'il baghetg da rodund 90 meters lunghezia brischa gia dil taliter, entschevein nus cun quella lavur dalla casa naven en direcziun dil baghetg annex. Ussa semuossa la construcziun da tetg loma sco grond problem, pertgei sut il tetg ardan quaders da lenn, fein e strom. Senza allontanar las plattas da stuors eis ei buca pusseivel da stizzar endretg il fiug. Per sustener las lavurs vegn in camiun dalla firma Caduff da Tavanasa en acziun. Tochen ch'il vehichel arriva sil plaz vegn il fiug stizzaus aschia ch'el sesanfla sut controlla. Cun agid dil camiun entscheivan las lavurs definitivas da stizzar che cuozan tochen allas 17.00 uras. Cunzun il fein pretenda bia lavur.





Conclusiuns 

La lavur dils pumpiers ei stada fetg buna, tuts han luvrau ruasseivlamein e beinponderau. 

Meins sco scola, mobein per clamar en memoria a tuts pumpiers che legian questas lingias ei il prighel che sezuppa davos ina construcziun da metal. Il mument che la construcziun ei sederschida encunter la casa ei staus incalculabels, ei vegnius senza indicaturs da canera. Tuttenina ei semplamein tut sederschiu, sc'ina pischada che liua el sulegl. 

Plinavon vein nus giu il cletg d'esser equipai fetg bein e da ver avunda persunal sil plaz. Il temps ei staus ideals, 95% dalla basa da pumpiers eran presents. Igl auto-scala che suonda proximamein vess susteniu la lavur e levgiau quella considerablamein.









Gliesta dils mieds 

1 auto-cistiarna 
1 auto d'emprema intervenziun 
2 vehichels da transport cun divers carrs annexs 
1 scala mecanica 
1 sprezza a motor tip 2
52 pumpieras e pumpiers 
4 persunas dalla sanitad 
2 (4) polizists 
ca. 900 m lingia da transport 
ca. 700 m lingia da pressiun