Vus sesanfleis silla pli veglia pagina da pumpiers dil cantun Grischun. Dapi la stad 1998 (dapi 2001 sut atgna adressa) provedin nus la publicitad cun informaziuns davart noss'organisaziun, quei per romontsch e tudestg. Medemamein anfleis Vus era nus tier Facebook nua che nus presentein fatgs cuorts e nua ch'in Like-it fagess plascher a nus! Nossa pagina cuntonscha buc mo persunas indigenas, mobein ei era enconuschenta lunsch sur ils cunfins dalla tiara. Aschia vein nus gia astgau retscheiver in premi sco ina dallas tschun meglieras paginas da pumpiers dalla Svizra.

Ils pumpiers da Medel/Lucmagn, Tujetsch e Mustér fuorman communablamein in'organisaziun da pumpiers, tenor la surfatscha la gronda dil cantun Grischun. Sper las lavurs da basa provedin nus era la regiun Cadi sco center d'intervenziun e purschin ulteriurs survetschs naziunals. Sin nossa homepage anfleis Vus tuttas informaziuns impurtontas davart noss'organisaziun, rapports da seracass, informaziuns per la prevenziun ed aunc bia auter. 

Vus veseis - nus sespruein da porscher in bien survetsch d'informaziun dapertut nua che Vus veis ina colligiaziun culla reit. Aschia giavischein nus a Vus bien divertiment da fuffergnar tras nossas informaziuns.

Vos Pumpiers Sursassiala


30 d’uost 2019: Beinvegni alla notg dallas portas aviartas

La Federaziun svizra da pumpiers festivescha siu 150. anniversari. Ensemen cun 700 ulteriurs corps da pumpiers dall’entira Svizra festivein nus cun els ed arvin venderdis sera, ils 30 d’uost naven dallas 18.00 uras las portas ella Gassa da Cuoz 1 a Mustér. Ensemen cun nos partenaris, la polizia, la gruppa samaritana, la Corporaziun d’aua Spina da Vin ed il menaschi tecnic dalla vischnaunca da Mustér vein nus preparau per tuts visitaders ina interessanta spassegiada.

Ils affons dallas treis vischnauncas cumpigliadas han creau per quei di posters davart ils pumpiers. Allas 19.30 ha liug la surdada ufficiala e benedicziun da treis novs vehichels: il vehichel da commando (2018), il camiun ABC (2018) ed il niev autocistiarna (2019). L’ustria sil plaz procura pil beinstar corporal. Nus selegrein da Vossa viseta!