8-8-2026. La sonda vargada han 16 commembers dil corp da pumpiers absolviu ina scolaziun da salvar persunas dall’ altezia sustenida cun sugas. Sut la direcziun cumpetenta dad Otti e Curdin Flepp ein ils participonts vegni instrui en las basas per luvrar a moda segira cun sugas sco era da salvar persunas.
La scolaziun ei s’orientada tenor il nivel da scolaziun 1 dalla lavur en l’ altezia dalla SUVA. El center ein stai en special las enconuschientschas fundamentalas, l’enconuschientscha dil material, il diever segir digl equipament persunal da protecziun encunter curdadas, tecnicas semplas d’access cun sugas sco era il salvament d’ina persuna ord l’ altezia.
Per nies corp da pumpiers ha quella scolaziun in motiv concret che stat en connex cun nossas intervenziuns: El tunnel d’access Sedrun sa ei esser necessari d’evacuar a moda segira ina persuna dalla plattafuorma da salvament. Muort las cundiziuns localas ei in salvament convenziunal buca pusseivels en mintga situaziun. Perquei ston las forzas d’intervenziun esser capavlas da salvar ina persuna dalla plattafuorma a moda segirada e controllada cun agid da sugas.
Duront la scolaziun ein ils process necessaris vegni elaborai pass per pass e silsuenter exercitai praticamein. Leutier han apparteniu: il diever ed il controllar correctamein igl equipament, l’installaziun dils sistems da segironza, il diever segir dils apparats utilisai sco era differentas situaziuns da salvament da persunas.
In’attenziun speciala ei vegnida dada alla segirtad ed alla collaboraziun enteifer la squadra. Tier lavurs cun prighel da curdar ston tut ils mauns e pass esser segirs ed incumbensas e responsabladads enteifer il team esser definidas claramein.
Cun haver absolviu quei cuors disponan ussa 16 commembers dil corp da pumpiers dallas basas necessarias per saver exequir, en cass d’in eveniment el tunnel d’access Sedrun, in salvament dalla plattafuorma da salvament a moda segira e coordinada.
In cordial engraziament ad Otti e Curdin Flepp per la direcziun cumpetenta e la scolaziun orientada alla pratica.
