11 d’avrel 2026 – in di tut spezial per nos pumpiers, mo era per il claustra da Mustér.
Per l’emprema gada havein nus organisau ina scolaziun intensiva per ils giuvens (e quels restai giuvens) paders e fraters dalla claustra da Mustér. L’idea ei naschida en connex el rom d’in exercezi annual d’evacuaziun ed entras discuors, surtut cun pader Murezi, che ha era gidau activamein tier la preparaziun.
In incendi en claustra ei per nus pumpiers ina gronda sfida. Biaras parts dil baghetg ein tecnicamein sin il pli niev stan grazia als sistems da protecziun encunter fiug, perquei che l’entira claustra ei vegnida renovada ils davos decennis. Tuttina para il baghetg per persunas che enconuschan buca el – e quei ei la gronda part da nos pumpiers – sco in labirint. Perquei essan nus, tier mintga intervenziun, dependents da persunas ch’enconuschan il liug.
Fortunadamein ha la claustra saviu retscheiver ils davos onns plirs giuvens paders. Quei motiv ha schau nescher l’idea da scolar quellas persunas per ch’ellas sappien sustener nus en cass d’ina intervenziun en claustra. Per che quei funcziuneschi, ston persunas ed ils andaments esser enconuschents – quei spargna bia temps en cass serius.
Il program ei perquei staus planisaus consequentamein: En ina emprema part havein nus persequitau in alarm, naven dalla communicaziun entochen alla liquidaziun tras ils pumpiers. En fuorma da giug havein nus simulau in eveniment e spert ei semussau che tut ils diesch participonts ein stai zun interessai. Ei ha dau damondas e vivas discussiuns.
Suenter havein nus tractau l’evacuaziun e il cumbat encunter il fiug cun mieds sempels. Nus havein mussau ina part da nies equipament per ch’ils participonts survegnien ina idea tgei ch’ ei pusseivel e tgei premissas ch’ein necessarias per saver duvrar quels mieds.
Sco finiziun vein nus equipau tuts cun apparats da respiraziun. Quella part ha giu plirs intents: Da mussar con grev che la tscherca da persunas ei el fem, mo era da far veser che spazis enconuschents san daventar spert ina trapla. Tut ils diesch paders han mess senza hesitar in apparat da respiraziun si dies ed han tschercau localitads en trups da dus.
Quei miez di ei staus in grond success per omisduas varts. Il pli impurtont intent ei vegnius contonschius: la regla KKKK – en crisas enconuscher persunas e lur cumpetenzas. La scolaziun ha dau segirtad als participonts ed ha era priu la tema, aschia che mintgin sa agir pli ruasseivlamein e ponderadamein en cass serius.
