(Poca GR) Venderdis avonmiezdi ei in auto collidaus a Sedrun cun pliras persunas. Ina dallas persuna ei vegnida blessada mortalmein e duas autras persunas blessadas miezgrev tochen grev.
Tenor las empremas enconuschientschas ha il manischunz dil vehichel, in um da 87 onns, sbagliau cuort avon las 10.00 uras sin ina via da quartier il pedal da gas cun quel da frenar. Il vehichel ha accelerau ed ei carraus en quater persunas ord ina gruppa da scolars cun lur persunas d’accumpignament. Ina dunna da 47 onns ei vegnida blessada aschi grevamein ch’ella ei morta sin il liug digl accident.
Duas buobas da 13 onns, blessadas miezgrev tochen grev, ein vegnidas tgiradas suenter entras persunas presentas che han prestau emprem agid, silsuenter da dus teams dil Servetsch da salvament Surselva sco era da duas equipas dalla Rega per lu vegnir transportadas el Spital cantunal Grischun sco era el Spital cantunal da Lucerna. In buob ei vegnius blessaus levamein ed ei vegnius tractaus ambulantamein.
Per la tgira dallas ulteriuras persunas dalla gruppa ei il Care Team Grischun staus en acziun. Medemamein ein ils Pumpiers Sursassiala stai en acziun. Sut la direcziun dalla Procura publica dil Grischun sclarescha la Polizia cantunala ils detagls e las circumstanzas che han menau a quest accident da traffic.
Nus exprimin allas famiglias pertuccadas ed a tut ils confamiliars nossa profunda condolientscha.
