05-11-2024 (rapport poca)

Igl gliendisdis ha ei dau ina collisiun frontala sin la via dil Lucmagn. Ina camiunetta ei cupitgada cun in auto da persunas. Treis persunas ein vegnidas blessadas.

In um da 46 onns ei carraus suenter las 10.15 sin la via dil Lucmagn da Curaglia en direcziun Mustér. Suenter ina storta a seniester ei sia camiunetta selischnada sin la punt sur il Rein anteriur e collidada frontalmain cun in auto che vegneva encunter, manischaus d’ina dunna da 58 onns. Igl um da 46 onns ei vegnius blessaus miezgrev e la dunna da 58 onns ed il passagier ein vegni blessai levamein. Las persunas blessadas ein vegnidas tgiradas da duas equipas dil Salvament Surselva sco er d’ina equipa dalla Rega. Igl um blessau miezgrev ei vegnius transportaus cul helicopter dalla Rega el spital cantunal a Cuera ed ils dus ulteriurs cun ambulanza el Spital regiunal a Glion. La protecziun cunter incendis ei vegnida garantida dalla gruppa da salvament Sursassiala che ha era susteniu las autras forzas d’intervenziun.