Il remplazzament dils vehichels vegls dils Pumpiers Sursassiala sisum la Surselva va ei in pass pli lunsch: Cun dus novs vehichels pil transport da persunas e material vegnan in bus VW T5 da 2004 ed in Toyota Hilux da 1998 remplazzai. Omisdus vehichels caschunavan problems  e possedevan dabia ruina.

Il Center d’intervenziun Sursassiala ei seformaus 2008 cu las vischnauncas da Mustér, Tujetsch e Medel ein sedecididas da fusiunar lur corps da pumpiers. Vitier il grond territori da survetsch vegn era il territori vischin nua ch’ils pumpiers adempleschan plirs pensums regiunals per Cantun e las viasfier SBB ed MGBahn. La fusiun ha lubiu dad investar considerablamein ell’infrastructura ed aschia ei uss quasi igl entir parc da maschinas remplazzaus ed optimaus. Era ils dus vehichels novs dil tip MAN TGM 3.180 siaran ina largia e possibiliteschan da buca mo transportar material, mobein era persunas. Era sch’ils vehichels semeglian ordadora in l’auter ei lur funcziun differenta e quei vesan ins pér cun in sguard egl intern. Il consruider dils vehichels Rosenbauer SA dad Oberglatt ZH ha numnadamein adattau las funcziuns aschia ch’il vehichel staziunaus a Sedrun posseda ina part cun apparats per la protecziun dalla respiraziun, ferton ch’il vehichel a Mustér sa vegnir duvraus pil transport da persunas ni material, gest tenor basegns. Cun paucas manipulaziuns sa quel numnadamein vegnir svidaus aschia che l’entira surfatscha digl intern stat a disposiziun per cargar material. Era vein nus dau peisa ch’ils vehichels drovien neginas lubientschas specialas da carrar ed aschia survargan els buca la peisa maximala da 3.5 tonnas. La firma da grafica Pitwerk dad Oberglatt ha adattau las inscripziuns aschia ch’ils vehichels han uss ina cumparsa unitara.

Tuts nos vehichels possedan in num che stat en relaziun culla regiun ni culs pumpiers. Aschia ein era ils dus novs vehichels vegni battegiai la sonda vargada da nos dus plevons sur Mathew Kurian e ser Christoph Zingg: In cun il num Placi en honur dil patrun dalla claustra da Mustér e l’auter cun il num Vitus, in dils gidonters d’urgenza.

Il medem mument vein nus era astgau prender en funcziun il niev center per retabilir e schubergiar il resti ed equipament persunal. Cun maschinas da lavar industrialas sa il resti vegnir lavaus, impregnaus e schigentaus ed ils apparats per la protecziun dalla respiraziun san medemamein vegnir schubergiai, desifectai e controllai. Quei center ei previus en in niev concept dalla segirada da baghetgs cantunala GVG che ha gidau da finanziar ton ils vehichels, sco era ils novs indrezs da schubergiar.