18-3-2019. Igl ei cuort avon mesa las treis dalla notg ch’in habitont d’ina casa da pliras famiglias constatescha in fried curios. El mira suenter e vesa beinspert che la habitaziun sisum la casa brischa. Immediat alarmescha el ils pumpiers ch’arrivan cuort suenter sil plaz da seracass. Ulteriurs elements da Mustér e Medel suondan cuort suenter. Cunquei che la dimensiun dil fiug semeglia dètg gronda, alarmescha igl officier responsabel per Tujetsch immediat igl entir corp da pumpiers. Cun dus vehichels da stizzar, igl auto-scala e grazia all’attacca interna dils trups cun protecziun dalla respiarziun ei il fiug fetg spert sut controlla. La fassada, sco era ina combra e la stiva piteschan grond donn da fiug. Grazia all’intervenziun tactica cun in umbrival da fem e pli tard il ventilatur, sco era ina buna tecnica da stizzar dat ei negins donns da fem ed aua en casa. Ils habitonts dalla casa han saviu vegnir spindrai fetg spert ed han buca pitiu donn. Aunc la damaun han els saviu returnar en lur habitaziuns intactas.