14-4-2018. La depopulaziun dalla val occupescha las autortads communalas da Medel gia dapi onns. Mo era ils pumpiers piteschan dalla digren dalla populaziun. Las biaras persunas incorporadas lavuran duront il di ordeifer vischnaunca ed aschia vein nus stuiu tschercar sligiaziuns per garantir in maximum da segirtad ella val: anteriurs pumpiers che possedan beins purils ella val ein sedeclarai prompts da segidar. Els vegnan alarmai ensemen culs pumpiers e procuran per las mesiras d’urgenza dallas empremas minutas. Ina gada ad onn ein els clamai ad in exercezi da pumpiers per emrpender e repeter. la lavur adossada ad els. Denter auter emprendan els co manipular correctamein ina sprezza a motor, il salvament da persunas ed animals senza metter sesezs en prighel, enconuscher ad uras prighels, montar lingias pil transport dad aua ed endrizzar il plaz d’intervenziun per ils vehichels e las forzas che suondan. Era la communicaziun stat el center. Aschia san els informar sur func il meinacziun, da maniera che lez sa alarmar ulteriuras forzas d’intervenziun e specialists sco ei fa da basegns. Sco secund grond corp da pumpiers dil Grischun ston structuras esser adattadas alla sitaziun geografica. Mo aschia san standards d’intervenziun vegnir risguardai. Tier in alarm partan treis gruppas da treis loghens il medem mument. Las persuans alarmadas ein specialists d’intervenziun, per part era scolai per intervenziuns sin via e viafier, per havarias ABC ed incendis d’uaul. Mo aschia sa vegnir dau damogn a tuttas sorts d’intervenziun senza stuer clamar ina massa persunas sil plaz.