25-2-2018. Suenter che la suprastonza dalla vischnaunca Medel/Lucmagn ed il cussegl da vischnaunca da Tujetsch han dau unanimamein glisch verda pil remplazzament digl autocistiarna defect, ha era il cussegl communal da Mustér suandau la damonda e concediu unanimamein il credit necessari. Aschia sa il vegl autocistiarna da 34 onns vegnir remplazzaus. La submissiun ha giu liug il november e december 2017. Sis construiders da vehichels han offeriu 8 differents vehichels, quels mintgamai cun l’opziun dad ina cabina dubla. Cun excepziun dad in furnitur ein tuts stai a Mustér per presentar lur products. Minuziusamein vein nus evaluau tut ils 396 puncts dalla submissiun cun risguardar las cundiziuns da surdada. Gudignau ha la furnitura digl autoscala, la firma Rosenbauer Svizra dad Oberglatt.  L’evaluaziun dallas offertas e la presentaziun sil plaz han mussau che tuts furniturs han fetg buns products e ch’ils detagls fan las differenzas. Cunquei ch’il prezi decida 50% han denton plirs vehichels spiars la selecziun sulettamein muort il prezi. Tier l’elecziun dil niev autocistiarna vein nus dau peisa a suandonts criteris:  buna motorisaziun funcziunalitad dalla pumpa adattaziun per nossa regiun (compact, pign radius da volver, dimensiuns)  Entras adina puspei tschentar la damonda „Savein nus era stizzar senza quella funcziun?“ eis ei stau pusseivel da reducir las funcziuns dil vehichel sin in minimum ed aschia era ils cuosts. La buna experientscha cugl autoscala muossa: pli sempel e meglier = pli surveseivel e capeivel per tuts. Gest quei sto in tal vehichel esser. Sco pumpiers da milissa luvrein nus buca di per di culs vehichels, tonpli sto tut esser funcziunal e surveseivel. Il tetg da cuosts da 450’000 frs. daus avon dalla GVG savein nus medemamein tener en. Nus vein denton era giu cletg: prezi dil vehichel e fermezia digl euro ein stai per nus. Gia oz, dus meins pli tard, vesa la situaziun ora autruisa: igl euro ei carschius, il prezi dil vehichel per 27%. Dalla cabina dubla vein nus sapientivamein desistiu ed aschia saviu spargnar rodund 40’000 frs. Il sistem d’intervenziun cun treis deposits ei numnadamein aschia che nus savessen mai emplenir quella cabina cun avunda glieud e pigl exercezi drova ei buc ina tala investiziun pil transport da persunas. Per gliez vein nus auters vehichels. Ussa suonda l’empustaziun definitiva dil vehichel. Il medem mument vein nus d’eleger las colurs e la partiziun groppa dil material. Il vehichel vegn lu construius parzialmein a Linz ell’Austria. La montascha fina e las caussas specificas svizras succedan lu ad Oberglatt el cantun Turitg. La furniziun dil vehichel ei previda sin la fin fevrer/entschatta mars 2019.