25-4-2017. Capeta in accident sin in tschancun d’ina via cantunala ni d’ina viafier, regla il cantun Grischun claramein tgei forzas d’intervenziun che vegnan clamadas. Per quellas sfidas dat ei basas da pumpiers ed ambulanza egl entir cantun. Medemamein ei reglau co l’intervenziun ha liug. Aschia vegn clamau dalla vart dils pumpiers adina duas organisaziuns sch’igl accident ei pli gronds ni che quel sesanfla en in tunnel. Mo co vesa ei ora leu nua ch’ei dat neginas organisaziuns grischunas da mintga vart? Sisum la Surselva era tochen oz mo l’intervenziun sur il Lucmagn reglada. Per il Pass Alpsu existeva negin concept vicendeivel cul cantun Uri. Quei ei ussa semidau. Naven dad immediat collaboreschan las duas basas da pumpiers dad Andermatt e Sursassiala, buca mo sil sectur dalla via, mobein era dalla viafier. La Viafier dil Matterhorn Gottard ha signau ils contracts corrispundents culs cantuns Grischun ed Uri e metta era a disposiziun material. Sper igl usitau material da salvament vegnan era duas locomotivas da diesel, ina staziunada a Mustér, l’autra ad Andermatt cun in carr da material ed in carr da persunas en funcziun. Tier l’alarmaziun semtgan ils pumpiers il material che sto vegnir cargaus sil tren, la stad ei in access pusseivels sigl entir tschancun culs vehichels da pumpiers. En rama d’ina sentupada sil Pass Alpsu ei la collaboraziun entrada en vigur. il cader dils pumpiers dad Andermatt ei sentupaus cul cader dalla Sursassiala, representants dalla MGB e dils cantuns. Avon e duront igl apéro ei era vegniu discussiunau davart entginas pendenzas, mo era creau plans da collaboraziun pil futur.   Sco proxim pass vegnan ils tschancuns denter las staziuns examinai. Cun cartas specialas d’intervenziun vegnan fixai ils loghens d’installaziun, las plazzas pil helicopter e las tschaffadas d’aua. Tuts prighels specials vegnan nudai aschia ch’il meinacziun ha pli sempel d’agir. Il secund pass vegn ad esser exercezis d’intervenziun els divers loghens. Malgrad che Uri posseda autras structuras politicas ch’il Grischun sil sectur da pumpiers essan nus perschuadi dad haver anflau ina buna via e finalmein ver sligiau ina pendenza urgenta.

fotos: Bruno Achermann, Gion Tenner