10-2-2016. En sesez di la lescha claramein co il salavament tier in accident sin via ha da succeder. Quei vala naturalmein era pil Pass Lucmagn nua che las treis organisaziuns da cazzola blaua polizia, sanitad e pumpiers vegnan en acziun. Empau auter denton sespleiga la situaziun igl unviern cun neiv e prighel da lavinas. La Pro Lucmagn ch’ei resposnsabla per la via sto procurar che la segirtad da quella seigi dada. Ella remplazza aschia igl uffeci da construcziun bassa. Lavinas s’audan denton buc tier las cumpetenzas dallas treis organisaziuns da cazzola blaua ed aschia essan nus visai sigl agid da specialists en persuna dil Salvament alpin svizzer e dalla squadra militara staziunada sil Scopi. Sco persunas dil fatg enconuschan ellas ils prighels e possedan era igl equipament necessari tier in accident da lavina per encurir persunas sparidas. Aschia ei il giavisch d’ organisar in exercezi communabel gia daditg sin meisa e la Pro Lucmagn sco responsabla ha perquei clamau las organisaziuns sil plaz. Duront igl exercezi che ha giu liug la sera tard ei beinspert semussau ch’ ils presents capeschan lur fatg ed ils pazients ein spert vegni localisai e salvai. Igl ei denton era semussau che las organisaziuns che lavuran pil pli sulettas ein buca disadas da collaborar ed enconuschan era buca las structuras naziunalas d’in post da commando alla front, resp. igl endament dil plaz da seracass (OI-Grischun). Quei ei capeivel perquei che las organiszaiusn drovan en sesez buca talas structuas sch’ellas ein persulas. Tier ils elements da cazzola blaua ein las directivas denton ligiontas e vegnan era exercitadas tier mintga exercezi. Aschia ha l’organisaziun e coordinaziun caschunau difficultads che ston ussa en in secund pass vegnir eliminadas.  

Foto: H. Huonder, ANR