2003, cura ch’ il cantun Grischun ha introduziu siu niev concept da salvament, ei Mustér vegnius elegius denter auter sco liug da basa per in autoscala. Las casas aultas, la claustra, las casas da vegls, hotels e baghetgs d’ industria ein stai il motiv per il liug. Mo ei ha duvrau treis ulteriurs onns tochen ch’ in tal vehichel ei propi vegnius staziunaus tier nus. La caschun ei sedada entras la vendita d’ in autoscala entras la GVZ, in vehichel ch’ ei vegnius cumpraus dils pumpiers da Rüti, silsuenter staus staziunaus a Weinland. Il vehichel ha gleiti 30 onns ed ils davos onns caschunan reparaturas cuosts enorms. 2016 fuss la revisiun dalla scala stada en roda, mo la relaziun denter cuosts e nez stat en negina rama, vegn vitier che nus savein buca dir qual mument ch’ in auter toc disdescha. Igl auto da scala ha fatg buns survetschs, ei deplorablamein vegnius entgins meins memia tard e vess saviu vegnir duvraus tier il barschament dalla cuort claustrala.  Aschia vein nus stuiu sedecider per in remplazzament e vein scret ora la damonda tenor lescha da submissiun. Sis offertas ein vegnidas inoltradas, per part sur il prezi giavischau. Quel sedrizzava numnadamein suenter las exprientschas fatgas dad autras vischnauncas grischunas che han medemamein stuiu remplazzar lur vehichels ils davos onns. Nus vein denton giu cletg e la firma Rosenbauer vegn a furnir nies niev vehichel, in vehichel da demonstraziun da strusch 3 onns. Il vehichel sez ei dalla firma Mercedes, tip Atego 1529, la scala ei dalla firma Metz, sper Magirus la pli enconuschenta e veglia firma da construcziun da tals utensils. La cumbinaziun Mercedes/Metz ei pia in cletg e plaida per qualitad sill’ entira lingia. La scala sto gie tener puspei 20 tochen 25 onns! Actualmein sesanfla il vehichel a Karlsruhe tier la firma Metz, nua che la scala vegn revidida cumpleinamein. L’ inauguraziun succeda ils 28 da matg, a caschun d’ in di dallas portas aviartas. Pli tard vegn la scala presentada cheu sin nossa pagina pli detagliadamein.  fotografia: G. Tenner (vehichel duront la presentaziun a Mustér)