[26-2-2015] … mo ei ha rendiu da spitgar! Gia 2012 han ils Pumpiers Sursassiala, resp. il cantun Grischun, surpriu dils pumpiers da caverna las incaricas sil plazzal da construcziun dalla NEAT a Sedrun. Ensemen cun la AlpTransit Gottard vein nus elaborau in concept da segirtad ed intervenziun. Spert ei semussau ch’ils mieds sil sectur dil schurmetg da flad ein buca sufficients e ch’ei drova migliur. Ensemen culla Assicuranza d’edifecis dil cantun Grischun vein nus decidiu d’investar en dus vehichels da transport aschia ch’ils pumpiers san intervegnir directamein sortend dil vehichel.  Gia 2008 tier la fusiun dils corps da pumpiers ei il giavisch d’investar en vehichels specials pil schurmetg da flad staus avon maun. Da lezzas uras vein nus denton sligiau il problem a moda sempla cunquei che autras investiziuns han giu prioritad. 2012 ein ils emprems contacts cullas firmas da producziun sedai ed oz astga la firma Walser SA da Zezras furnir dus vehichels pil schurmetg da flad. Naven da 2016 vegn lu la Viafier federala a surprender la cumpart dalla AlpTransit Gottard e gia oz sescolein nus intesivamein per esser semtgai sil di nua ch’il pli liung tunnel da viafier dil mund vegn prius en funcziun. Ils vehichels ein dil tip Mercedes Sprinter 519 CDI, 5 tonnas (4×4, cun mecanissem a girs plauns accuplabel) ed ein da principi construi tuttina. Tuttina dat ein ina pintga differenza tier ils moduls che vegnan duvrau. A Mustér secumponan ils moduls spirontamein ord material dil schurmetg da flad, ferton ch’il bus a Sedrun cuntegn ina pumpa a pressiun aulta. Ensemen fuorman ils dus vehichels in ferm team che vegn da stizzar fiugs pigns tochen mesauns. Igl ulteriur material ei per encurir e liberar persunas dil tunnel, cunzun cameras termicas ed ulteriur material per tschercar e marcar. Analog alla scolaziun entras la ifa-Balsthal vein nus uss optimau il sistem d’encurir persunas aschia ch’ina surfatscha gronda sco il tunnel e las hallas a Sedrun ein spert sut controlla. Entras la participaziun dalla GVG astgan ils vehichels era vegnir duvrai ordeifer il tunnel. Cheu segirescha cunzun il modul da stizzar l’emprema intervenziun per il territori tujetschin. Ils 9 da matg 2015 ha liug ina fiasta d’inauguarziun per tuttas persunas involvadas. La populaziun ha pli tard la pusseivladad da prender investa dallas novas maschinas en connex culla gronda fiasta d’avertura dil tunnel 2016. Nus vegnin a reportar pli detagliadamein cun igl ei aschi lunsch.       

Ils Pumpiers Sursassiala engrazian allas persunas stadas involvadas da vart da ATG, GVG e VFS. Nus vegnin a far tut pusseivel da porscher in bien survetsch en ed ordeifer il tunnel. {gallery}vehichels2015{/gallery}