1-3-2014 En Val Russein vegn l‘ovra electrica Russein actualmein engrondida e modernisada. Quei pretenda era dalla vart dils pumpiers in engaschi special. Aschia essan nus sentupai cun signur Fanconi e signur Werner dalla firma responsabla per la planisaziun per mirar tgei seracass ch‘ein pusseivels e co nus savein prevegnir per in‘intervenziun efficienta. Prighels ha ei avunda dentuorn. Sper il fiug restan differents prighels da lavur ed era la via al plazzal Barcuns ei buca senza. Ensemen cun nos pumpiers partenaris vischins Sumvitg/Trun vein nus creau ina gruppa speciala d‘intervenziun. En quella gruppa separticipeschan era specialists da tunnels ord la gruppa dil Tunnel da basa dil Gottard e specialists da pionier. Per l‘entschatta avrel ei planisau in exercezi da cader communabel, pli tard in exercezi d‘alarm culla gruppa pertuccada.