23-1-2014. Vischnauncas muntagnardas ein da principi disadas cun donns elementars, seigi quei lavinas ni bovas. Malgrad ils prighels ed ils seracass che serepetan adina pli stediamein capeta relativamein pauc. Ils motivs ein differents: dad ina vart han las vischnauncas investau ils davos decennis milliuns ell‘infrastructura da segirtad, da l‘autra vart han ellas denton era empriu ord il vargau co ir entuorn il meglier cun talas situaziuns. E gest per ch‘il davos punct vegni perfecziunaus ei il stab da crisa dalla vischnaunca da Medel/Lucmagn seradunaus la sonda vargada, ils 18 da schaner per exercitar il seracass. All‘entschatta han ils responsabels communals giavischau ina mes‘ura scolaziun vid il niev sistem da func Polycom. Spert ei semussau ch‘il cuors d‘introducziun d‘avon miez onn entras la protecziun civila ha buc schau anavos gronds fastitgs. Il sistem da func dètg cumplicaus pretenda da sefatschentar adina puspei culla materia. In ritmus da miez onn ei denton pauc sufficients. Aschia ha il cantun introduciu in sistem che vegn strusch a funcziunar el seracass, cunzun tier las vischnauncas nua ch‘ils apparats vegnan duvrau mo sporadicamein ni insumma mai. Medel ha uss refrestgentau la savida e vegn a far quei regularmein era el futur. Mo co stat ei cullas vischnauncas che han mess lur funcs en truchet? La part principala dalla scolaziun ha cumpigliau l‘organisaziun duront in seracass e cunzun la lavur dil stab. Ils participonts han empriu d‘enconuscher l‘organisaziun d‘in stab da commando ed il sistem da luvrar en quel. Suenter ina part teoretica han els giugau in scenari per seprofundar aunc dapli ella lavur, cunzun era ella communicaziun. Aschia ei il tema medias era vegnius sin meisa. Alla fin dil cuors han tuts participonts ofniau il giavisch da saver cuntinuar e far in proxim pass. Denton ei gia oz clar: la vischnaunca da Medel ha fatg in bien pass anavon ed ei gia bein semtgada per la proxima intervenziun pli gronda..