text: Beni Hendry

fotos: Pierino Bisquolm

A Tusaun organisescha la Segirada d’edifecis dil Grischun gia per la tiarza gada eveniments culla tematica „fiug ed aua“. A quei invit han era las 5./6. classas dalla Sursassiala priu part. Ils 14 da settember han circa 70 affons dalla Sursassiala fatg enconuschientscha culs prighels dil fiug e dall’aua. Scolaras e scolars ein stai incantai d’astgar brattar il baun da scola culs vestgius da pumpiers. La finamira principala da quella acziun ei da render attents ils giuvenils co reagar en cass urgents, mo era da mussar las consequenzas horriblas d’incendis e d’aua gronda.

El dargun “Nolla” han ils affons observau l’immensa forza dall’aua gronda. Exempels da flums migeivels che san daventar anetgamein glimaris destructivs havein era nus avunda en nossas treis vischnauncas. El dargun ha ei dau ina surpresa nunspitgada! Il guid ha mussau dad ir alla tscherca dad aur (pirit) e quei ha muentau la febra da tut ils affons. Entgins rimnaders ha runau a casa ina brava carga crappa preziusa.

Suenter gentar, tgei gaudi d’astgar sevestgir sco vers pumpiers avon che vegnir confruntai cun la realitad dil fiug! Ils instructurs han informau davart las numeras d’alarm principalas: fiug 118, sanitad 144, polizia 117, Rega 1414.

Igl ei denton era vegniu luvrau pratic. Aschia han ils affons empriu co stizzar cun la cozza speciala ina cazzeta ardenta. Egl object da trenament han ils “detectivs” stuiu tschercar caussas che savessen caschunar in barschament. Las scolaras ed ils scolars han prest giu nudau ils prighels e retschiert bien laud digl expert. L’explosiun ch’ei ha dau enten stizzar ina cazzetta cun ieli ardent ha tementau ed impressiunau finadin.

Grazia alla purschida generusa dalla Segirada d’edifecis dil Grischun han nos affons passentau in di instructiv cun cuntegns cuzzeivels.