Text: Gion Tenner, maletgs: Letizia Schmed

Suenter la teoria suonda la pratica. Aschia vein nus giu quei bellezia venderdis sera nies emprem exercezi sin via. Dalla vart dils pumpiers sco dalla vart dalla sanitad ein puspei novas persunas en acziun ed aschia vein nus vuliu entscheiver a moda sempla.

 La fermezia dallas duas basas – d’ina vart la Basa d’ambulanza Cadi, da l’autra vart la Basa da Pumpiers Mustér – ein ils exercezis communabels. Adina cu igl ei pusseivel (e quei ei tochen oz adina stau il cass) exercitein nus sin via ensemen. Il motiv ei fetg sempels: era sche mintga cass ed il seracass en special ei differents, entras la lavur communabla emprendan tuts participai co ils auters lavuran. Sch’ins enconuscha quellas tecnicas ed era las pusseivladads e fermezias da mintga partenari, san ins era profitar da quei per il seracass.

Exercitar la realitad aschi bein sco pusseivel munta era ver pazients preparai a moda realistica cun blessuras pusseivlas. Per quella sparta vein nus nossa specialista Letizia Schmed che semtga mintga pazient tenor giavisch. Il resultat selai mirar ed ei strusch da distinguer dalla realitad. Mo tals pazients lubeschan era alla squadra da sanitad da prestar lavur da vaglia.

In auter punct ei il seracass sin via cul traffic che pretenda da tuts in quitau special, mo era in quitau per ils auters. Era vid quei lein nus disar nies persunal.

Nos treis pazients Adrian Decurtins, Fabio Pimenta e Florian Berther han giugau lur rolla fetg bein. Quei ei decisiv ed in punct dapli datier alla realitad. Sco meinacziun ha Ronny Levy giu il commando, el che posseda bein ina buna scolaziun el salvament sin via, mo negina experientscha sco meinagruppa ni officier. Gest perquei ha el fatg bein sia lavur. Ord la discussiun suenter igl exercezi ei lu era semussau con impurtonta che quella scumiada da rolla ei: in pumpier ei meinacziun. Pér lu realiseschan tuts sil plaz con impurtont ch’igl ei dad informar periodicamein il meinacziun.

 La lavur ei stada buna, cunzun la ruasseivladad che nus essan disai ha buca muncau. Quei ei impurtont. Entras igl auto-scala ha il plaz saviu vegnir illuminaus sin distanza. Tut quella canera da motors ei aschia stada naven. Con impurtont ch’igl ei d’exercitar cun pazients ha era in pign accident (per cletg eis ei schabegiau pauc) mussau cun far liber las finiastras. Ferton ch’ei emporta tier igl auto vit buca nua che la sigir tucca la finiastra, ei quei auter sch’ei ha pazients egl intern.  In ulteriur punct ei la triascha che la persuna responsabla dalla sanitad fa. Cunquei che nies exercezi ei staus igl emprem e nus vein vuliu ch’ei vegni luvrau pass per pass, vein nus gest saviu emprender che buc igl access il pli spert ei il meglier, mobein che quel sedrezza tenor las blessuras dils pazients. Tier la preparaziun digl exercezi ein ils pazients vegni postai aschia ch’il pazient cun la pli greva blessura ha saviu vegnir spindraus pér il davos.

 Danovamein vein nus astgau prender bunas experientschas cun nus sin via a casa, experientschas che vegnan dabien a tuts il mument ch’il cass ei serius.

 A tut quels ch’ein segidai sin ina moda ni l’autra engraziel jeu grondamein. In bien team vegn da prestar buna lavur, quei ha igl exercezi puspei mussau inagada dapli.