Ils 28 da matg ha giu liug igl emprem exercezi communabel denter ils Pumpiers Medel ed ils Pumpiers Mustér. Per ils pumpiers da Mustér ei la sera stada el rom d’in exercezi normal da pumpiers, ferton ch’ils pumpiers da Medel ein vegni alarmai entras il sistem d’alarm. 65 pumpiers ein stai en acziun, vitier vegnan 3 persunas dils organs forestals.
Las sunadontas finamiras principalas ein stadas fixadas:
• transport d’aua sur ina distanza da rodund 1 km cun agid da SM tip II
• integraziun dil niev puoz da stizzar “Stagias”
• endrizzament d’in plaz da retrer aua pil helicopter
• execuziun dil plan da seracass “Stagias” e controlla dallas calculaziuns
• collaboraziun cun ils organs forestals
Tuttas finamiras ein vegnidas contonschidas. Il plan da seracass sa vegnir surprius, entginas enconuschientschas san denton aunc vegnir amplificadas.
Puncts da migliurar: l’organisaziun dil plaz da seracass ha buca funcziunau bein. L’informaziun permanenta entras officiers e meinagruppas sto aunc vegnir megliera.
Nus engraziein a tuts pumpiers per il grond engaschi. In engraziament special va als organs forestals cun Urban Maissen (bostger circuital), Edwin Deflorin (bostger communal Mustér) e Corsin Flepp (bostger communal Medel). Els han contribuiu buca meins per il beingartegiar digl exercezi.
Retratga d’aua “Val da Cusch”, ina dallas paucas pusseivladads ella regiun Stagias. Da cheu anora ei l’aua vegnida transportada sur ina distanza da 960 m ed ina differenza d’altezia da rodund 80 m entochen al puoz da stizzar.
Retratga d’aua per il helicopter. Las treis vischnauncas dalla Sursassiala possedan 4 tancs; dus da 8 m3, dus da 5 m2, che san vegnir spisgentai cun ina sprezza a motor tip I.
La Surselva ei la regiun cun il secund bia barschaments d’uaul el cantun Grischun. Gest las vischnauncas sisum la Cadi possedan grondas surfatschas d’uaul.
Agl ur dil puoz da stizzar. Igl ADP da Mustér ei en acziun e furnescha aua per in canun d’aua e 6 bucchins. La furniziun d’aua per minuta munta a rodund 3000 liters.
