10 da december 2005
Ils novizs han giu lur emprem miez di da scolaziun. Duront quater uras han els empriu d’enconuscher lur equipament persunal, l’organisaziun dil plaz da seracass, las incumbensas dils pumpiers, la funcziun ed il diever dalla scala a maun e las liberaziuns cun suga.
7 da december 2005
La collaboraziun denter 118 e 144 vegn intensivada. Bein lavuran las duas organisaziuns gia dapi onns ensemen, ina gada ad onn exercitein nus era communablamein. Ussa vegn era ina part dalla scolaziun fatga da cuminonza: allas 20.30 uras han ils pumpiers informau davart l’organisaziun dil plaz da seracass per in accident e mussau cun ina presentaziun ed in film las incaricas da mintga organisaziun. Alla sera d’informaziun vein nus era astgau beneventar la gruppa samaritana che fa ussa part dil corp da pumpiers cun 11 persunas. Quella gruppa stat era a disposiziun al 144 sch’ei fa da basegns e sa vegir alarmada via SMT. In proxim pass ei in exercezi pratic che vegn ad haver liug el decuors dalla primavera 2006.
29 da november 2005
Roger Tuor daventa niev gerau per ils pumpiers. El remplazza Duri Huonder ch’ei staus responsabels per nies departement duront sis onns. Al gerau partent engraziein nus per sia lavur prestada e giavischein bien success cun sias novas spartas, al niev gerau giavischein nus ina buna collaboraziun ed in bien maun per sia nova sfida.
Beat Flepp ed Augustin Maissen han absolviu cun success la scolaziun da tecnicists per apparats dil schurmetg da flad 1 tier la firma Dräger.
19 da november 2005
Mumpé Medel, allas 14.30 uras: Cun agid digl auto da pressiun sto la pressiun dall’aua dalla lingia da furniziun al reservoir Stagias vegnir baghegiada si da niev. Cunquei che la lingia naven dallas fontaunas al reservoir ha negina pendenza, funcziunescha la furniziun d’aua mo entras la peisa dall’aua.
18 entochen ils 21 da november 2005
Adatg: interrupziun dalla reit d’alarmaziun sur pager! Pumpiers equipai cun pager ein supplicai da prender il telefonin cun els. Ils alarms sur telefon funcziuneschan sco usitau.
14 da november 2005
Roman Bass cumpletescha la gruppa da pumpiers novizs, aschia che nus vein 6 pumpiers novs ch’entscheivan proximamein lur survetsch.
25 d’october 2005
Carcarola, las 21.23 uras: Entras in cuort brischa in furnel. Grazia alla sperta reacziun dil possessur dalla casa ha mo il furnel pitiu donn.
20 d’october 2005
En sia seduta dad ier sera ha la cumissiun da fiug incorporau tschun novs pumpiers. Nus fagein perquei in cordial beinvegni a Curdin Cajacob, Manuel Flepp, Pirmin Monn, Silvio Steger e Flurin Wetzel.
Plinavon ein las perstgisas vegnidas tractadas. Deplorablamein constatein nus adina puspei che certs pumpiers emblidan da dar en perstgisa. La cumissiun ha relaschau siat persunas ord il survetsch da pumpiers, ils biars per motivs professiunals ni da vegliadetgna.
19 d’october 2005
Grond exercezi per polizia, sanitad e pumpiers el tunnel da Mumpé Medel. Dus autos ein cupitgai, endisch pazients en prighel da veta.
9 d’october 2005
La polizia da fiug cantunala publichescha ils datums e termins per 2006.
8 d’october 2005
Segnas, las 15.18 uras: Enten carrar anavos scarpa in camiun si siu tanc da diesel. 250 liters diesel flessegian sin via ed ella canalisaziun da quella. Grazia alla sperta reacziun dil camiunist dat ei minims donns. La tiara penetrada digl ieli ei vegnida remplazzada cun humus frestg e vegn dismessa ella barscharia a Vaz sut.
A caschun dalla tscheina finala dein nus cumiau als dus fideivels pumpiers Gion Lutz e Gabriel Venzin che han prestau duront 20 onns survetsch da pumpiers. Medemamein bandunan nus Marc Manetsch e Patric Caminada sco meinagruppas e Corsin Lutz sco pumpier.
27 da settember 2005
21.50 uras: Alarm da fiug per il pichet 1: silla Furtga han vischins engartau in fiug ed annunziau quel alla centrala a Cuera. Quei che semegliava ella stgiraglia propi sc’in fiug pli grond era en realitad mo ina candeila. Tuttina: in fiug egl uaul da schurmetg sur la claustra vess saviu ver consequenzas fatalas.
20 da settember 2005
Era a Mustér ha liug la davosa fin dalla jamna l’acziun “72 uras”. Ils pumpiers ein vegni dumandai per agid per far ina fotografia ord l’altezia. Quella ei era gartegiada, denton cun incaps. Per cletg essan nus stai pli baul che fixau sil plaz ed era la posiziun dalla massa da persunas ha stuiu vegir midada, perquei ch’il liug fixau dallas organisaturas era buc ideals. Bein fuss ei iu da far ina fotografia, mo enta peis steva in candelaber dil plaz da ballapei.
Ils scolars han encuretg duront 72 uras il pli bi plaid romontsch da Mustér. L’elecziun ei curdada sin ENGRAZIEL.
11 da settember 2005
Mintg’onn fagein nus ina retscherca per migliurar la qualitad dalla basa da pumpiers. Ils resultats obteni ils davos dus onns tschontschan per in bien corp da pumpiers.
3 da settember 2005
Florian Giger e David Lutz absolveschan cun success il cuors da cader per specialists ell’ustonza d’ieli e chemia. Suenter plirs onns da vacanzas ein quels posts puspei occupai cun persunas scoladas era sin basa da cader. Cordiala gratulaziun!
3 da settember 2005
Tschun novs candidats stattan a disposiziun per il survetsch da pumpiers naven da 2006. La recrutaziun dallas persunas ei era uonn stada nunproblematica. Cun ils novs pumpiers sereducescha igl effectiv dil corp sin 61 (62) persunas.
23 d’uost 2005
Grazia alla reacziun sperta ed intensiva cun agid da dus scavaturs gronds han donns vid baghetgs ella Val da Segnas/Val da Cuoz saviu vegnir impedi. Fermas precipitaziuns ella regiun da Gendusas/Caischavedra han procurau ch’igl ual da Segnas ei carschius taluisa che l’aua curreva sur la riva ora. Plinavon impedevan grondas quantitads da crappa e glera che l’aua saveva cuorer dil létg usitau giuadora.
22 d’uost 2005
Egl Entlebuch a “Schwändi” el cantun Lucerna han dus pumpiers piars lur veta questa notg. Ils pumpiers eran vegni clamai pervia dallas grondas malauras che han caschunau grondas inundaziuns. Ils dus pumpiers ein vegni surpri d’ina bova.
Als parents e camerats admettein nus nossa sincera condolientscha e giavischein ad els bia forza e consolaziun en quellas grevas uras.
7 d’uost 2005
13.58 uras: alarm per il pichet 1. Il vent ha scarpau parzialmein surora il tetg dil baghetg ch’ei ars il venderdis sera. Il prighel ch’il baghetg savess dar ensemen ei per quei motiv carschius. En in’acziun vegn igl entir tetg allontanaus cun ina suga da fier ed in vehichel. 12 pumpiers ein stai en acziun.
Igl areal entuorn il baghetg ei dapi il barschament serraus per la publicitad.
6 d’uost 2005
17.57 uras: exercezi d’alarm per il salvament sin via. Alla Punt Stalusa ha ei dau in accident cun in auto. Duas persunas ein serradas el vehichel e ston vegnir salvadas. 12 pumpiers e 2 persunas dalla sanitad ein alarmai. Rapport e maletgs suondan.
6 d’uost 2005
Pumpiers novizs anflan las informaziuns corrispundentas davart il survetsch da pumpiers sut “novizs”. Annunzias per entrar en survestch ston vegnir fatgas a scret entochen ils 15 d’uost 2005 a: Basa da Pumpiers Mustér, commando, 7180 Mustér
5 d’uost 2005
21.17 uras: Barschament d’in clavau a Sut Gassa (Salaplauna sut). Affons che han fimau el zuppau han caschunau il barschament. Il mument ch’ils pumpiers arrivan sil plaz ei il baghetg en fiug e flomma. Tuttina gartegia ei da stizzar spert il fiug.
5 d’uost 2005
Il vehichel d’occasiun ei identics a quel dils Pumpiers Pisoc (maletg).
In auto-scala per la regiun Cadi. En ina seduta d’informaziun dils geraus responsabels pils pumpiers dalla Cadi, dils cumandants da pumpiers e persunas dils stabs da pumpiers ha colonel Hansueli Roth informau davart la cumpra d’ina auto-scala per la Cadi. Tuts presents ein stai dil meini ch’in tal vehichel fetschi da basegns. En in’ulteriura seduta vegnan ils representants dallas vischnauncas a decider davart la finanziaziun dil vehichel. La regiun dalla Cadi ei oz la davosa regiun che posseda negin vehichel da scala.
In auto-scala porta divers avantatgs buca mo el cumbat encunter fiug en casas pli aultas. Anzi, era tier barschaments da casas dad ina ni duas famiglias e cunzun el coc da nos vitgs serrai sa in tal vehichel prevegnir ad ina catastrofa, cunquei ch’igl ei pusseivel d’attaccar il fiug da surengiu. Sper il cumbat encunter fiug sa il vehichel era vegnir duvraus per liberaziuns da persunas ord la profunditad, per fixar vehichels d’accident, mo era sco access a loghens prigulus e difficultus.
28 da fenadur 2005
Fiasta naziunala digl emprem d’uost: actualmein regia in prighel mesaun d’incendis. Vischinas e vischins vegnan perquei supplicai da ver special quitau enten barschar fiugs bengals. Nus supplichein possessurs da habitaziuns da vacanzas e hoteliers da far attents lur hosps sin il prighel.
6 da fenadur 2005
Grond exercezi per la sanitad sil plazzal dalla NEAT a Sedrun. Per l’emprema gada vegn la secziun sperta da sanitad en acziun sisum la Cadi. Varga 60 persunas ein presentas. Igl exercezi che ei staus in success ei ina scolaziun e preparaziun per in secund pass nua che pumpiers, polizia e sanitad vegnan a luvrar ensemen, gest sco igl ei previu tier in seracass grond. (Informaziuns e rapport suondan.)
7 da fenadur 2005
La firma Vogt fa revisiun dallas sprezzas a motor e digl auto da pressiun.
4 da fenadur 2005
Alarm per igl entir corp da pumpiers. Sco usitau dat ei ina gada ad onn in alarm per tut ils pumpiers. Quel ha giu liug egl internat dalla claustra da Mustér. Collaborau cun nus han era la sanitad 144 e parts dall’Uniun samaritana Mustér.
29 da zercladur 2005
11.47 uras: In cametg dat fiug a plontas a Cumiera. Cunquei ch’il fiug ei buca veseivels suenter 10 minutas ed il prighel dad ulteriurs cametgs ei fetg gronds, desistin nus d’ina intervenziun.
26 da zercladur 2005
Il prighel da barschaments d’uaul e pastira crescha cuntinuadamein. Era urezis locals pon buca mitigar la situaziun. Informaziuns detagliadas davart la situaziun da schitgira el cantun anfleis Vus dasperas sut “Barschaments d’uaul”. Ulteriuras informaziuns anfleis Vus sin la homepage digl uffeci forestal cantunal. (www.wald.gr.ch)
11 da zercladur 2005
15.16 uras: Barschament da pastira a Mumpé Medel. Sin ina deponia illegala brischa il material deponiu. Cunquei ch’igl auto da pressiun sto vegnir emplenius pliras gadas cuoza la lavur da stizzar pli ditg. Plinavon caschunan las lavurs da stizzar in prighel da crappa sin la via cantunala (Via Lucmagn) aschia che quella sto vegnir segirada.
A Tusaun termineschan Roger Lutz, David, Lutz, Tino Sabbadini, Beat Flepp, Rinaldo Cavegn ed Andreas Deflorin cun success il cuors per pumpiers dil salvament sin via. Cordiala gratulaziun!
3 da zercladur 2005
23.21 uras: Alarm da fiug a Mumpé Medel. Suenter ver visitau il liug vein nus constatau ina gruppa che grillava enstagl dil cametg annunziaus. Pli bugen denton inagada dapli ch’ina gada memia pauc.
30 da matg 2005
Exercezi per las dunnas da Madernal e Pardomat. En ina sera emprendan ellas co stizzar in pign fiug da grass cun la cozza da fiug, co metter en funcziun in hidrant e cumbatter in incendi entochen ch’ils pumpiers arrivan.
25 da matg 2005
Ferms urezis caschunan inundaziuns a Vitg e Funs. Duas gadas ston ils pumpiers serender sil plaz e pumpar giu l’aua che penetrescha els baghetgs.
Igl emprem alarm succeda allas 18:45 uras. Ils pumpiers han da pumpar ora il tschaler dalla banca Raiffeisen, segirar ina plaunca ad Acletta e pumpar ora in tschaler a Funs. A Fontanivas periclitescha in dutg la via cantunala.
Il secund alarm allas 22:45 uras pertucca il center da sport nua che l’aua ei penetrada ellas localitads dil schurmetg civil. Donns da persunas ha ei dau negins.
25 da matg 2005
Restructuraziun dalla gardaroba en local da pumpiers. Igl equipament cumplet drova dapli plaz en local da pumpiers che previu dall’entschatta. En in’acziun speciala han nos scrinaris midau entuorn la gardaroba per gudignar dapli plaz, denton sin donn e cuost dil plaz da material. La situaziun da plaz ad Acla da Fontauna ei precara pir che mai.
21 da matg 2005
Ils hidrants dalla corporaziun d’aua Spina de Vin resplendan en nova colur unificada. Ils hidrants ein vegni colurai dallas scolaras e dils scolars dalla tiarza secundara e reala. Grazia alla colur cotschna ein els ussa beinvesibels, cunzun era igl unviern.
Ils hidrants vegnan manteni dallas corporaziuns d’aua ch’ein responsablas per la funcziun. Duront igl unviern procura la vischnaunca ch’ils hidrants seigien libers da neiv e da tut temps accessibels. Il diever dils hidrants ei denton mo lubius als pumpiers, privats ston far ina damonda e pagar il diever dall’aua.
12 da matg 2005
La claustra ei ussa colligiada cun la centrala d’alarm a Cuera. Ils plans da seracass stai creai per quei baghetg ein ussa cumpleinamein en funcziun.
10 da matg 2005
Ils pumpiers s’audan tier la gruppa da clamadas che gaudan la pli gronda confidonza tier la populaziun svizra. Tenor ina retscherca dil magazin “Reader’s Digest” fidan 97% dalla populaziun cumpleinamein als pumpiers che sesanflan sin posiziun in.
Silsuenter suondan las tgirunzas (95 %) ed ils pilots (90 %), sco quei ch’il magazin rapporta. La pli pauca confidonza gaudan ils schurnalists (35 %), persunas da reclama (31 %), vendiders d’autos e cussegliaders da finanzas (mintgamai 28 %) e lunsch anavos ils politichers (18 %). Ella media schaian ils purs (81 %), scolasts (74 %), manischunzs da taxi (65 %) ed organisaturs da viadi (55 %).
Per la retscherca ch’ei vegnida fatga ell’entir Europa ein 1100 Svizras e Svizzers vegni dumandai. En tuttas tiaras figureschan ils pumpiers sigl emprem plaz.
10 da matg 2005
Alarm regiunal pil schurmetg da flad. Ier sera ein las secziuns dil schurmetg da flad da Tujetsch, Medel e Mustér vegnidas alarmadas a Curaglia. Il pensum ei staus da spindrar 4 persunas ch’eran sedisgraziadas en ina caverna dall’ovra electrica. Meins igl encurir las persunas ei stau in problem. Persuenter ha il transport da quellas caschunau dapli difficultads e pretendiu dabia cundiziun. Igl exercezi ha mussau che la collaboraziun ed il sistem d’alarm funcziuneschan. Tuttas finamiras han saviu vegnir contonschidas.
7 da matg 2005
Novitads per candidats per igl examen da camiun. La polizia da fiug finanziescha 750.00 frs. vid igl examen da camiun C118. La categoria C118 ei ina categoria speciala el cantun Grischun. Possessurs da quella categoria san carrar cun vehichels da pumpiers cun dapli che 7.5 tonnas enteifer ina regiun dil cantun. Niev ei era ch’igl examen sa puspei vegnir fatgs el liug, nun ch’il manischunz giavischi in examen che vala per “igl entir mund”. Informaziuns detagliadas suondan, mira era sut links (Uffeci stradal cantunal).
1. da matg 2005
Bialaura ed ils pass Alpsu e Lucmagn ein puspei aviarts. Gia registrescha la polizia sil Pass Lucmagn in accident cun velo a motor. Il manischunz vegn blessaus e sto vegnir transportaus cul helicopter el spital a Lugano.
Igl engaschi dils pumpiers ei oreifers. La secziun digl auto a pressiun ha in niev survetsch da pichet. Da niev dorman ils autists el vehichel per esser pli sperts.
Pli serius ei il tema suandont: per intervegnir il temps d’intervenziun vein nus mesirau quel ier suentermiezdi.
30 d’avrel 2005
Adrian Deflorin terminescha cun success il cuors d’officier a Tusaun. Cordiala gratulaziun.
22 d’avrel 2005
01.50 uras: Alarm da fiug. Quei che semeglia l’entschatta ina caussa clara (il di avon han emploiai d’ina firma barschau legalmein roma) sesviluppescha tras curiosas informaziuns tier ina vera acziun d’encurir fiug. Schizun il cumandant da Sumvitg sto vegnir alarmaus. Probabel setractava ei dil fiug a Fontanivas, segirs da quei essan nus aunc oz buc.
21 d’avrel 2005
Fabian Manetsch, Andi Jacomet, Marco Schmed, Gion Petschen e Placi Manetsch absolveschan cun success il cuors d’introducziun el schurmetg da flad. Cordiala gratulaziun
22.05 uras: Alarm entras la centrala da fiug dalla Südostschweiz Print SA. In annunziader defect caschuna il clom nocturn.
19 d’avrel 2005
Ier sera han rodund 30 commembras e commembers dalla’Uniun samaritana Mustér priu part ad ina informaziun e scolaziun tier ils pumpiers. Ils presents han empriu co sedepurtar sil plaz da seracass, co quel vegn organisaus e las structuras novas dil schurmetg dalla populaziun.
14 d’avrel 2005
Di naziunal per il 144! Nos partenaris dil survetsch da salvament han da sbatter cun ils medems problems. Era lur clom d’agid ei buca enconuschents alla populaziun. Perquei vala: per tut igl agid da sanitad cloma il 144.
9 d’avrel 2005
Rinaldo Cavegn, David Lutz e Marco Schmed absolveschan cun success il cuors per meinagruppas a Tusaun. Cordiala gratulaziun.
4 d’avrel 2005
La midada dils apparats dil schurmetg da flad naven dad Interspiro sin Dräger ei puspei in pass anavon. Il gliendisdis ein puspei treis novs apparats da Dräger vegni furni. Aschia essan ussa en posses da 9 apparats da Dräger ed aunc 6 apparats dad Interspiro. Cun il temps vegnan era aunc quels remplazzai.
24 da mars 2005
Avis: il barschament dils 22 da mars a Fideris ha caschunau fetg gronds donns da material e mess en prighel persunas ed animals, tut perquei ch’il clom d’urgenza 118 ei vegnius alarmaus memia tard. Nus supplichein Vus d’annunziar incendis ladinamein e senza targlinar al clom d’urgenza 118. Pli bugen stizzein nus nuot ni mo in pign fiug ch’in grond incendi. Engraziel per Vossa collaboraziun.
21 da mars 2005
La suprastonza communala ha fixau da niev las taxas per prestaziuns enviers tiarzas persunas. Las taxas valan per prestaziuns extraordinarias e supplementaras.
15 da mars 2005
Hidraulica ei il tema per la scolaziun da cader regiunala che ha liug damaun. Ils pumpiers vegnan confruntai cun plirs exempels co quintar la prestaziun da maschinas per far in transport d’aua. Cunzun en nossa regiun, nua ch’ei dat bia uaul ed ils transports d’aua ein zun impurtonts, eis ei necessari che mintga pumpier da cader sa far tals quens.
2 da mars 2005
Il cader da pumpiers sin viseta el niev vitg da vacanzas dalla REKA. Signur Pius Giger presenta ils siat baghetgs, per part aunc en construcziun. In rapport detagliau davart il niev vitget suonda.
27 da fevrer 2005
Suandonts pumpiers han absolviu cun success il cuors d’introducziun per novizs a Trun:
Fredy Caminada, Martial Deplazes, Manuel Deplazes, Andi Jacomet, Fabian Manetsch, Gion Petschen. Cordiala gratulaziun.
17 da fevrer 2005
Barschament d’in tgamin a Gonda. Allas 22.35 uras vegn il pichet 1 clamaus en agid per evitar in barschament. Cun agid dil spazzatgamin sa il tgamin stuppau vegnir fatgs libers, aschia ch’il cauld po puspei da tgamin siadora.
13 da fevrer 2005
Cun gronda maioritad decida il pievel da Mustér da conceder in credit dad in milliun francs per la sanaziun dil Hotel Acla da Fontauna. Il niev hotel da 4-5 steilas duei vegnir aviarts l’entschatta december 2006. Pil mument sensanfla ina part dil material da pumpiers ellas garaschas dil hotel. La vischnaunca vegn a stuer tschercar novas sligiaziuns nua deponer il material.
10 da fevrer 2005
Il biro d’architectura Aluis Huonder gudogna la concurrenza d’ideas per in niev luvratori communal. Dils quater projects inoltrai ha la varianta perschuadiu la giuria il meglier.
2 da fevrer 2005
En ina studia dil Club da Turing svizzer vegnan las vias naziunalas e principalas classificadas tenor il risico d’accidents. La via sur il Pass Lucmagn sesanfla ella classa 2, quei che munta in ault risico.
17 da schaner 2005
Yvonne Flepp vegn elegida sco nova presidenta dall’Uniun samaritana Mustér.
8 da schaner 2005
23.56 uras: Barschament d’in container a Raveras. Il cuntegn dil container peglia fiug entras burnida deponida el container. Il fiug sa vegnir stizzaus enteifer cuort temps. Dus pumpiers ein stai en acziun.
5 da schaner 2005
17.05 uras: Barschament en in magasin d’ina garascha a Sedrun. Muort in sbagl sin la centrala d’acziun a Cuera vegnan ils pumpiers da Mustér clamai en acziun. Il barschament ei spert staus sut controlla.
1 da schaner 2005
Il niev concept da scolaziun “Pumpiers 2005” passa en vigur. Da vart dalla polizia da fiug vegnan las novas normas da baghegiar per la protecziun encunter incendis introducidas.
