Mintga tschun onns vegnan las organisaziuns da cazzola blaua controlladas entras in exercezi pli grond. Ils 19 d’october 2005 ei quei stau il cass per la regiun Cadi. Sut la marella ein vegnidas pridas: 
• la polizia cantunala Mustér/Glion
• la basa d’ambulanza Mustér/Cadi 
• la basa da pumpiers Mustér/Cadi, partiziun salvament sin via 

La dimensiun digl exercezi ha pretendiu ulteriurs partenaris sil plaz: 
• il corp da pumpiers Medel/Lucmagn 
• il schurmetg da flad dalla basa da Mustér 
• parts dallas uniuns samaritanas da Medel e Mustér 

Plinavon han suandontas persunas ord la sparta survetschs tecnics susteniu nus: 
• Uffeci da cosntrucziun bassa dil cantun Grischun 
• Aurax Energia 
• Picaro, Carosseria Sedrun 
• Toni Riedi, garascha Sedrun 
• Frars Wetzel SA, garascha Mustér 

Per il beinreussir digl exercezi vein nus ulteriuramein survegniu igl agid dad endisch figurants che han giugau lur rolla exemplaricamein. 
En tut ein rodund 70 persunas stadas en acziun. 
maletgs: Christoph Berger 
text: Gion Tenner 

La preparaziun 

Cun inschign han ils dus scolasts samaritans Letizia Schmed e Gabriel Venzin preparau las plagas a nos “pazients”. 
Ferton ch’ils pazients vegnan mulaschai, vegn il plaz d’acziun preparaus. Inagada ch’ils pazients ein stai postai, ha Ignaz Furger (responsabel ambulanza) empruau da far alarmar agid… 

Sco scenari vein nus construiu in accident el tunnel da Mumpé Medel nua ch’in vehichel ei collidaus cun in bus da scola. Dus butschins cun diesel ch’il secund auto veva cargau ein ruclai sin via ed han piars liquid. Treis persunas ein grev blessadas, entgins affons van tschorventai tras il tunnel. 
Pér il secund autist ha priu serius la caussa ed ha telefonau alla centrala 144 a Glion.

La polizia arriva… 

Aunc avon che pumpiers ed ambulanza ein alarmai, arriva gia la polizia sil plaz d’accident. Ils polizists reageschan fetg bein ed alarmeschan las forzas necessarias per saver far il spindrament. La via vegn marcada e segirada. 

Fem spess sortescha dil tunnel. 
Per ils observaturs entscheiva uss la lavur da dretg. Augustin Calivers, inspectur districtual da pumpiers, meina l’acziun. El vegn sustenius dad Ignaz Furger (sanitad), Urs Paulin e Gion Tenner (pumpiers). 
Sco hosps ed observaturs d’ordeifer ein sil plaz: Renaldo Lutz (uffeci da construcziun bassa), Pauli Manetsch (aurax energia), Hans Huonder (pressa) e Christoph Berger (documentaziun). 
Ambulanza e pumpiers arrivan il medem mument sil plaz. Dapi igl accident ei gia bia temps vargaus, inagada dapli perquei che buca tuts san co alarmar polizia, sanitad e pumpiers. 
Senza schurmetg da flad va nuot. Vitier vegn che quels pumpiers ston esser scolai sin il salvaments sin via. Ils specialists ein tschercai. 

La segirtad ha prioritad… 

L’organisaziun dil plaz da seracass vegn endrizzada entras ils pumpiers. Ils responsabels s’entaupan per discussiunar il proceder. La collaboraziun denter ils partenaris ha funcziunau optimalmein. 


Il salvament en acziun…. 

Per furnir avunda aua sigl auto da pressiun vegn il corp da pumpiers Medel/Lucmagn alarmaus. Ils pumpiers construeschan ina lingia da transport da 1000 meters. 

Suenter che la protecziun da fiug treidubla ei en funcziun parta igl emprem trup el tunnel per mirar la situaziun. 


Bilanza 

En tut priu ei igl exercezi gartegiaus bein. Sco puncts positivs ein da menziunar: 
• la buna collaboraziun denter las organisaziuns sil plaz, 
• l’organisaziun dil plaz sco tala, 
• la moda e maniera ruasseivla da luvrar, 
• la buna reacziun all’entschatta dalla polizia arisguard ils affons sepiars el tunnel 

Sco puncts da migliur san vegnir numnai: 
• il tempo da lavur che sto esser tier ils pumpiers pli sperts 
• la controlla per igl access al tunnel ch’ei fetg urgenta e che ha emprema prioritad 
• el tunnel han mo pumpiers dil schurmetg da flad access, lavurs vid il vehichel e pazients succedan mo entras pumpiers scolai ed equipai cumpletamein (prighel d’explosiun entras energia statica, prighel d’accidents entras maldiever dils uaffens hidraulics, blessuras supplementaras entras veider) 

Igl exercezi ha mussau fermezias e fleivlezias dallas qualas tuts participai san esser loschs ni vid las qualas els san semigliurar. Las planisaziuns per l’auter onn ein pil mument actualas, franc vegn in punct ni l’auter a dar in accent per il program da l’auter onn. 
Engraziament 
In sincer engraziament a tuttas persunas ch’ein stadas en acziun ni che han schiglioc gidau a preparar igl exercezi.

Tabella dils mieds 

3 polizists 
12 pumpiers salvament sin via 
36 ulteriurs pumpiers 
6 persunas dalla sanitad 
5 samaritans 

1 auto da pressiun 
1 auto da pressiun pign 
1 auto da pichet 
2 autos da transport 
19 apparats dil schurmetg da flad 
1 ambulanza (ina secunda ambulanza supponida, REGA supponiu) 
2 vehichels da polizia