Text: G. Tenner
Maletgs: G.-R. Daguati, polizia cantunala grischuna
5 d’uost 2005 – 21.17 uras: Alarm da fiug per il pichet 1. A Sut Gassa brischa in clavau. Sco las retschercas dalla polizia semuossan ei il fiug ruts ora entras affons che han fimau el baghetg. 42 pumpiers e 2 polizists ein stai en acziun. Decuors dil seracass
Mesiras d’urgenza
Cunquei ch’il baghetg schai giud via vegn immediat era il pichet 2 alarmaus, ils emprems meters ord casa muossan denton gia la dimensiun dil fiug, aschia ch’igl entir corp da pumpiers vegn clamaus sil plaz. En tut ein 42 pumpiers presents.
Analisa dil problem: Il clavau schai isolaus agl ur d’in plaun ed ei contonschibels sur ina via da funs ora. Igl Ual d’Acletta furnescha avunda aua per la sprezza a motor tip 2. Per menar neutier l’aua drova ei ina lingia da transport da ca. 400 meters. L’aura ei biala, il vent ei ruasseivels. Il diember dils pumpiers alarmai ed il material avon maun tonschan per l’intervenziun cunzun cunquei ch’il temps gioga buc in’aschi impurtonta rolla.
Giudicament dalla situaziun: Il baghetg arda gia cumpleinamein cu ils pumpiers arrivan sil plaz. Persunas ed animals ein buca cumpigliai. In prighel minim ch’il baghetg savess sballunar ei avon maun.
Decisiun: Cunquei ch’il baghetg ha valeta historica decidin nus da tener aschi bia sco pusseivel dil baghetg ed aschia da stizzar el en direcziun dalla val. (pli sempel da luvrar).
Decuors: Suenter che las lingias da transport sigl auto da pressiun ein avon maun, entscheivan las lavurs da stizzar. Gia allas 22.02 uras ei il fiug buca pli veseivels. Las lavurs vegnan sistidas tochen che la polizia ha dau liber il baghetg per stizzar era fueinas zuppadas. Quei succeda allas 22.30 uras. Allas 23.00 uras ei ina lingia da transport da 500 meters giud hidrant pinada per segirar il baghetg duront la notg. Maschinas e persunas fan retirada, ina guardia da notg controllescha il baghetg entochen la damaun allas 08.00 uras. Allas 10.45 uras ei tut material schubergiaus e semtgaus per la proxima intervenziun.
Remarcas
La lavur dils pumpiers ei stada fetg buna. Tuts han luvrau ruasseivlamein, las investiziuns el material dils davos onns ein secumprovadas. La collaboraziun cun la polizia cantunala ei stada exemplarica.
Buca capeivel ei per nus pumpiers che vischinas e vischins emprovan aunc adina da telefonar a numeras privatas per alarmar ils pumpiers. El mument d’in seracass – era sche quel ei mo pigns ni malguess – dat ei mo in numer da telefon – 118!
