da Fabian Manetsch, sd sf

La sonda, ils 26 da fevrer 2005, gia baul la damaun cun temperaturas fetg freidas ha il cuors per novizs entschiet a Trun. Suenter igl appel dallas 8 ein ils rodund 70 participonts dall’entira Surselva vegni parti en gruppas, mintgamai menada d’in instructer.  La finamira dallas empremas lecziuns ei stada d’enconuscher ils differents nuvs cun la suga en connex cun deliberaziuns da sesez e dad autras persunas. Suenter che nus havein empriu co tschentar endretg ina scala, cun ils differents camonds e las differentas lavurs da mintga trup, havein nus era saviu praticar e trenar ils nuvs vid la barella. Pils pumpiers da Mustér ei quei plitost stau repetiziun, demai che nus havein gia astgau guder quella scolaziun duront in exercezi el schaner.  La deliberaziun d’ina persuna cun la barella ord la secunda etascha s’auda segir tier ils highlights digl avonmiezdi a Trun. Tier quella lavur sesentevan las 7 pumpieras da Duvin ed ils 3 pumpiers (denterauter 2 da Mustér) en nossa gruppa buca tuts tuttina bein. Tegnan ils nuvs? Sa mintgin tgei ch’el ha da far? Ed autras damondas vegnan ad esser idas tras il tgau dil pazient en la barella. Igl ei denton iu sco giavischau, las finamiras cuntonschidas e la fom da gentar gronda.  Suenter ina cuorta teoria digl instructer districtual, Augustin Calivers, havein nus astgau guder in bien gentar en las differentas ustrias a Trun (nossa gruppa ell’ustria dil Tschut).  Allas 13.15 havein nus puspei cuntinuau cun nossa lavur sin ils differents plaz sigl areal dalla vischnaunca da Trun. Duront il suentermiezdi havein nus astgau visitar ils suandonts posts beinpreperai dils instructers e pumpiers da Trun, Breil e Mustér:   lingias d’aua auto da pressiun cun attacca sperta sprezza a motor schurmetg da flad stezzafiugs barschament d’ieli (p.ex. da frittar) hidrants- container da fiug   Ils differents posts ein stai fetg interessants ed han purtau als pariticiponts ina massa. Ferton ch’igl avonmiezdi ei plitost staus el senn dalla teoria, essan nus vegni differentas gadas en acziun duront quei bi suentermiezdi a Trun.  Il highlight dil di ei senza dubis stau il container da fiug. Cunzun nus pumpiers da Mustér havevan spitgau vess sin quei, buca sco davos per saver empruar ora inagada endretg nies equipament persunal.  Ins ha sentiu fetg bein la tensiun da mintgin avon ch’el entri el container per sentir inagada las caliras d’in fiug en cumbinaziun cun in flashover. Silsuenter havein nus astgau attaccar il fiug cun in uder d’aua en trups da 3 persunas. Gest en quei mument sundel staus cuntents d’esser equipaus aschi bein, pertgei ei era detg sempel e cuort: “Huora cauld!!”  Schegie ch’ei fuss stau in bellezia di per ir cun skis, havein nus crei jeu tuts profitau da quella caussa. Suenter che mintgin ha opteniu il document ch’attesta la participaziun vid quei cuors, havein nus cargau nies uorden e priu la via encunter Mustér.