17 da december 2004
Il post da polizia a Mustér survegn in ulteriur polizist. Suenter che Felici Deflorin era vegnius pensiunaus dumbrava il post da polizia mo pli quater umens. Naven dil schaner 2005 vegn Gian-Reto Daguati ad entscheiver siu survetsch a Mustér. El ha ensemen cun 24 collegas gest terminau la scola da polizia a Cuera.
Denter ils novs polizists sesanflan era dus da Mustér: Denise Lozza e Stiafen Deflorin. Cordiala gratulaziun.
12 da december 2004
La discussiun davart il futur dil hotel Acla da Fontauna ei danovamein leventada. Discurriu vegn ei davart la renovaziun dil hotel. Aschia ha il cussegl da vischnaunca stuiu decider davart ina midada dil plan da zonas per saver realisar il niev project. Ina nova utilisaziun digl entir cumplex ei ina nova schanza per Mustér. Per ils pumpiers vul ei puspei dir midar casa. El connex cun il preventiv 2005 ha il cussegl da vischnaunca concediu in credit da projectaziun per in luvratori communal nua che forestalesser, stradalesser e pumpiers vegnessen mess suttetg. Il niev baghetg sligiass ina gada per adina la munconza da plaz che regia tier tuts treis menaschis da vischnaunca ed arvess al center da sport novas pusseivladads.
4 da december 2004
Text ord il plaid da cumiau per las unfrendas da Gretzenbach:
Der Solothurner Regierungsrat Roberto Zanetti hat sich nach Gretzenbach wie folgt verlauten lassen: “Ich schmunzle nicht mehr, wenn die Feuerwehr mit viel Tatütata durchs Dorf rast. Ich weiss jetzt, dass eine brennende Kerze, eine überhitzte Friteuse oder ein harmloses Mottfeuer in einem Flammeninferno enden können. Ich bin froh, wenn die Feuerwehr zehn Mal überrüstet ausrückt; das elfte Mal verhindert sie dadurch eine Katastrophe.”
28 da november 2004
A Gretzenbach el cantun Soloturn han siat pumpiers piars lur veta ier endamaun. Ils pumpiers eran vegni clamai ad in barschament en ina halla da parcar. Cuort avon la fin dallas lavurs da stizzar ei il tetg dalla halla sbalunaus ed ha cuvretg ils umens.
Als parents e camerats admettin nus nossa sincera condolientscha e giavischein ad els bia forza e consolaziun en quellas grevas uras.
21 da november 2004
Il relais da func a Mumpé Medel ei en funcziun. Ils tests succedi muossan in bien resultat. Aschia ei ina colligiaziun naven dil Pass Alpsu entochen Glion (cun antenna fixa en auto) pusseivla, cun in func da maun circa tochen Tavanasa. Ruosnas da func han aunc cuorts tschancuns ella Val Medel, denter s. Gions e Stgegia, avon la gallaria dil Lucamgn funcziunescha la colligiaziun puspei. Persuenter ein las ruosnas ellas Ruinas serradas. Il niev canal da func survescha cunzun per la coordinaziun denter ils differents corps da pumpiers tier seracass pli gronds, mo era per ils singuls corps nua che la colligiaziun era tochen oz buc pusseivla. La gronda part dils cuosts surpren la polizia da fiug, il rest repartan las vischnauncas da Medel, Tujetsch, Mustér e Sumvitg.
14 da november 2004
Alexander Heim ha absolviu cun success il cuors da meinacziun. Cordiala gratulaziun.
11 da november 2004
Cordial beinvegni fagein nus a nos novs pumpiers. ella seduta dalla cumissiun da fiug dils 10 da november ein vegni incorporai:
• Fabian Manetsch
• Manuel Deplazes
• Martial Deplazes
• Alfred Caminada
• Placi Manetsch
• Gion Petschen
• Andi Jacomet
• Thomas Levy
• Gian Andrea Schmidt
La polizia da fiug edescha la nova versiun dil concept “Pumpiers 2005”. Midadas dat ei las suandontas: la milissa ha dus exercezis, il cader in exercezi dapli. Per ils specialists SSV e SF sereducescha il diember d’exercezis. Ils meinagruppas han da niev mo pli mintga treis onns in di da scolaziun. Il medem vala per specialists UIC ed SF.
3 da november 200
Ils datums per ils exercezis ed ils cuors 2005 ein fixai. Pumpiers che han inoltrau il giavisch da far cuors duein far aschi bien e reservar ils datums.
1 da november 2004
Alexabder Heim absolva cun success il cuors d’officier II a Tusaun.
30 d’october 2004
La firma da telecommunicaziun Nägele – Capaul da Flem ha entschiet cun las lavurs vid la nova antenna da radio a Mumpé Medel. El project ei era integrau in niev relais da func per ils pumpiers dallas vischnauncas da Sumvitg, Medel, Tujetsch e Mustér.
25 d’october 2004
Ella seduta dils stabs da pumpiers dalla Sursassiala decidan ils presents da cuntinuar cun la collaboraziun. Planisai ein exercezis da cader e dil schurmetg da flad communabels.
4 d’october 2004
Otg candidats per il survetsch da pumpiers ein envidai ad ina sera da fuffergnadi. Sper la presentaziun dil corp da pumpiers, demonstreschan la secziun digl auto da pressiun e quella dil schurmetg da flad lur lavur.
27/28 da settember 2004
Scolaziun per ils emploiai da vischnaunca. En duas seras emprendan els co sedepurtar en cass da fiug e co duvrar ils mieds da stizzar ch’ein avon maun.
26 da settember 2004
Ils novs apparats pil schumretg da flad vegnan furni venderdis proxim! Ils apparats ad emprest van puspei anavos alla firma Foppa. Tier il barschament dils 28 da zercladur 2004 sigl areal dalla Alptransit a Sedrun ei la gronda part da nos apparats dil schurmetg da flad vegni donnegiai taluisa ch’ina reparatura fuss buca stada prudenta.
Gion Tenner absolva cun success il cuors d’instructurs II a Steffisburg (BE).
20 da settember 2004
Felici Deflorin, cau dil post da polizia a Mustér, va en pensiun. Per siu futur giavischein nus ad el in temps pli ruasseivel, sanadad e satisfacziun. Nus engraziein ad el per la buna collaboraziun ed igl agid che nus havein astgau retscheiver dad el. Sco successur ei Clemens Tomaschett vegnius elegius. Era ad el giavischein nus in bien maun per las novas incaricas e sperein che la buna collaboraziun denter polizia e pumpiers cuntinueschi.
16 da settember 2004
Adrian Lutz damogna cun success igl examen da camiun. La squadra digl auto da pressiun ha aschia in manischunz dapli. Cordiala gratulaziun.
3 da settember 2004
Igl UPF publichescha ils termins dils cuors 2005.
2 da settember 2004
Alarm da sbagl: ils emploiai dalla centrala d’alarm a Cuera muossan pauca capientscha dalla geografia grischuna. Danovamein cloman els ils falli pumpiers sil plaz. Fuorns schai ella Val Medel e consequentamein s’auda il vitg era tier quella vischnaunca.
28 d’uost 2004
Alarm d’exercezi en casa da vegls s. Gions. Lavurs vid la reit d’electricitad caschunan in incendi el surcombras dalla casa. Finamiras principalas ein stadas d’exercitar l’evaquaziun dils cussadents e da controllar la praticabladad dils plans da seracass per quei baghetg.
Roland Cajacob e Beat Flepp termineschan cun success lur scolaziun sco meinagruppas dil schurmetg da flad.
25 d’uost 2004
Alarm da fem ella bar Postigliun. Suenter ver localisau il canaster da miardas che barschava ei igl engaschi staus terminaus.
24 d’uost 2004
Ina malcapientscha procura per in sbagl d’alarm. Allas 20.00 uras vegn il pichet 1 alarmaus pervia d’in barschament d’ina casa a Camischolas (vischnaunca Tujetsch). Il clom anavos alla centrala lai sminar nuot bien, il polizist sa mo confirmar il barschament. E veramein sto ei esser enzatgei pli grond sche Sedrun cloma Mustér. En realitad fan ils pumpiers da Tujetsch in normal exercezi d’atun. Els ein stai pauc surstai d’udir nus sil func e da nossa presenza ella val. Tuttina: enteifer 11 minutas ein ils pumpiers da Mustér stai sil plaz. Fetg buna prestaziun! Nus schein Camischolas vinavon tier la biala Val Tujetsch, quei sa ussa era la centrala a Cuera!
17 d’uost 2004
Otg pumpiers novs per il corp. Ella seduta dalla cumissiun da fiug ha quella priu enconuschientscha dils novs candidats per il survetsch da pumpiers. Las persunas pertuccadas survegnan els proxims dis ina brev per prender posiziun.
13 d’uost 2004
Per l’emprema gada ein pumpiers da Mustér era presents ella cumpigna per cumbatter incendis d’uaul dil Grischun. Roger Lutz, David Lutz, Severin Lutz e Florian Giger ein s’annunziai per quella truppa. El mument ch’ei dat in incendi d’uaul en in liug dil cantun san els vegnir clamai per sustener ils corps da pumpiers locals.
6 d’uost 2004
Alarm da sbagl a Caischavedra. In possessur d’ina tegia ha barschau legalmein lenna. Cunquei ch’ei veva gest tunau e camegiau ella regiun ha in vischin fatg attents ils pumpiers sil fiug. Mo dus pumpiers ein stai en acziun per sclarir la caussa.
4 d’uost 2004
Novs plans da seracass per la ALPTRANSIT a Sedrun. Sin fundament dil barschament dils 28 da zercladur vegn igl entir areal dalla ALPTRANSIT surluvraus dils pumpiers. La lavur vegn documentada en novs plans da seracass che lubeschan intervenziuns pli spertas.
2 d’uost 2004
La fiasta digl emprem d’uost caschuna mo pigns problems als pumpiers. Malgrad la gronda schitgira ha ei dau negins incendis.
31 da fenadur 2004
Di dalla Pro Juventute tier ils Pumpiers Mustér. Varga 80 affons han fatg viseta tier nus per mirar co ils pumpiers lavuran. Sin divers posts han els buca mo astgau mirar, mobein era sezs empruar co quei ei dad esser inagada pumpier.
Ils pumpiers da Mustér organiseschan gia per la secunda gada quei di da fuffergnadi per ils affons. Las fatschas tarlischontas ein stadas igl engraziament per las bialas uras.
23 da fenadur 2004
Exercezi special pil schurmetg da flad. Cunquei ch’il schurmetg da flad segida duront la pausa da lavur el tunnel tier seracass, vein nus fatg nies exercezi culs pumpiers pertuccai el tunnel dalla NEAT a Sedrun. Ils pumpiers han giu la pusseivladad da prender investa dils indrezs 800 meters ella profunditad.
21 da fenadur 2004
Niev sistem d’alarm per la AlpTransit a Sedrun. Suenter in’analisa dil barschament dils 28 da zercladur ein ils dispositivs d’alarm vegni surluvrai. Niev integrai ein ils pumpiers dil tunnel Transco ed igl emprem pichet da Mustér.
9 da fenadur 2004
1000 meters uders da 75 ein oz vegni furni. En quater jamnas suondan aunc inagada 500 meters e 500 meters uders da 40. Cun quellas mesiras serrein nus ina gronda largia che nus vein stuiu constatar igl onn vargau en connex cun ils dus exercezis d’uaul. Las treis vischnauncas sisum la Cadi cun lur grondas surfatschas d’uaul possedevan numnadamein strusch 1200 meters lingia da transport. Mo igl emplenir il puoz da stizzar a Stagias drova sulet gia 960 meters.
7 da fenadur 2004
Exercezi special cun ils pumpiers dalla TRANSCO a Sedrun. La gruppa dil salvament sin via ha exercitau sigl areal dalla NEAT a Sedrun. Sin in post vein nus mirau nua ch’ils cunfins da nos apparats hidraulics ein, sin in auter vein nus liberau duas persunas ord l’altezia. La collaboraziun ha funcziunau fetg bein.
2 da fenadur 2004
Gronds problems da retablir il material ch’ei staus duvraus per igl incendi a Sedrun. Il fem tussegau che cunteneva cunzun chlor ed acid muriatic (Salzsäure) ha attaccau cunzun ils apparats dil schurmetg da flad, cunquei ch’ils pumpiers ein stai cun quels apparats directamein ella vischinonza dil fiug e fem. Il schubergiar caschuna cuosts da plirs mellis francs.
30 da zercladur 2004
Accident da traffic cun dus blessai a Zarcuns/Sedrun. In automobilist piarda la controlla da siu vehichel e rumpa tras ina seiv da segirtad.
29 da zercladur 2004
Barschament ella Val Bugnei. Entras lavurs da mateniment peglian las tschentas da transport da gera fiug sin ina lunghezia da 300 meters. Las emissiuns da fem e tuffien entras il gummi ein enormas. Pumpiers da Tujetsch e Mustér cumbattan cun schurmetg da flad e dus autos da pressiun il fiug.
19 da zercladur 2004
Urs Lüthi dalla firma VOGT SA surdat la nova sprezza a motor ed instruescha ils pumpiers. Dapli informaziuns davart la sprezza anfleis Vus sut “Vehichels”.
18 da zercladur 2004
Accident da camiun al pass Alpsu. In manischunz da camiun surschazegia l’altezia dil tunnel. L’entira construcziun da metal dalla punt vegn scarpada giu.
10 da zercladur 2004
La suprastonza communala decida en sia seduta dils 8 da zercladur da remplazzar la sprezza a motor defecta entras ina sprezza nova. La sprezza veglia deriva neu dil schurmetg civil ed ei vegnida acquistada igl onn 1968. Tier in exercezi avon duas jamnas ei la cassa dalla sprezza sefessa entras la pressiun (vegliadetgna dil material), quei che vess caschunau cuosts da reparatura da plirs mellis francs.
La sprezza nova vegn a ver ina pli aulta prestaziun, quei ch’ei bien d’engrau cunzun tier incendis d’uaul. Il material dalla sprezza veglia ed il carr annex stattan vinavon en funcziun.
5 da zercladur 2004
Adrian Lutz e David Duff fan il cuors cantunal sco specialists per sprezzas a motor a Tusaun. Cordiala gratulaziun.
Nova rubrica sin nossa homepage. Da vart dretga anfleis Vus niev la rubrica “Seracass Grischun”. Sut quella rubrica saveis Vus leger las communicaziuns da pressa dalla polizia cantunala nua che pumpiers ein stai en acziun.
31 da matg 2004
Scumiada dil pichet. Per dar a pli biars pumpiers la pusseivladad da prestar survetsch da pichet, scumiein nus ina part dil persunal cun la fin matg. Quellas persunas restan en survetsch entochen ils 30 da november. La nova repartiziun ei ussa online.
Donn irreparabel vid la sprezza a motor. La gievgia vargada duront in exercezi a Fontanivas ha la sprezza a motor buca dumignau la pressiun aschia che la cassa dalla sprezza ei sefessa (donn entras vegliadetgna dil material). Entochen che nus vein anflau ina sligiaziun segidan ils pumpiers da Medel cun lur sprezza a motor tip II.
27 da matg 2004
Nova suprastonza per la Corporaziun d’aua Spina de Vin. Ella radunonza extraordinaria dad ier sera han ils commembers dalla corporaziun elegiu Edwin Deflorin sco niev president. Plinavon ein vegni elegi: Marcus Berther, Tumaisch Desax, René Morgenthaler e Bruno Tschuor. Nus essan perschuadi che la buna collaboraziun denter provediment d’aua e pumpiers vegn era a cuntinuar cun la nova suprastonza e giavischein als nievelegi bien maun per las fatschentas.
15 da matg 2004
18.4 milliuns francs donns da fiug pil cantun Grischun 2003! Quei ein bunamein treis gadas dapli ch’igl onn vargau. Aschia han ils recavs dallas premias buca saviu cuvierer tuttas expensas. Tier ils incendis croda en egl ch’il carstgaun ei per la pli gronda part la cuolpa da quels, seigi quei entras malprecauziun, mo era entras dar fiug da bugen. 900 gadas ein ils pumpiers grischuns stai en funcziun. Quei ed aunc bia auter san ins leger el niev rapport da gestiun dalla segirada da baghetgs cantunala.
Il mardis vargau ha il corp da pumpiers giu siu secund exercezi, per l’emprema gada uonn cun tuts pumpiers. Ins ha sentiu fetg bein che las secziuns ein ussa structuradas e beinorganisadas. En quei connex ha nossa gallaria dils pumpiers finalmein saviu vegnir actualisada.
8 da matg 2004
Sin giavisch dil vischinadi Segnas organiseschan ils pumpiers ina sera da scolaziun per las dunnas. 17 dunnas separticipeschan, in diember che muossa il grond interess ch’ei avon maun. Las duas gruppas visetan dus posts: in nua ch’ellas emprendan il diever da stezzafiugs e l’auter nua ch’ei va per metter en fucnziun in hidrant e far pintgas lavurs da stizzar vid il fiug. Il resun final ei zun positivs. Per il beinreussir dalla sera han Roland Cavelti, firma Primus protecziun da fiug, ed ils pumpiers Andreas, Anselm, Armin, Ivo, Adrian, Augustin e Gion procurau. Bien engraziament.
1 da matg 2004
Roger Lutz terminescha cun success la scolaziun d’officier. Ussa ei il cader per la secziun sprezzas a motor cumpletta. Cordiala gratulaziun!
25 d’avrel 2004
Ussa ein era ils pumpiers novizs scolai. Els (Claudia Wenzin, Stefan Columberg, Adrian Lutz, Otmar Maissen e Remo Monn) ein separticipai cun success al cuors per novizs a Trun.
Sut informaziuns dat ei ina nova rubrica cul tetel prevenziun. Cheu anfleis Vus cussegls co prevegnir a barschaments ed accidents. La rubrica vegn cumplettada dafertontier.
12 d’avrel 2004
Inagada dapli vegnan ils pumpiers en acziun a caschun d’in concert a Mustér. Venderdis proxim dattan 9 musicstars concert en halla Acla. Ils organisaturs quentan cun 1800 tochen 2300 persunas. Dil corp da pumpiers vegnan 5 pumpiers ad esser presents cunzun per reglar il traffic.
4 d’avrel 2004
Gion Tenner terminescha cun success il cuors d’instructur federal 1.
Adatg: sin plauncas terreinas da vart sulegliva regia prighel da fiug. S’informei cun il link seniester davart il prighel da fiug en nossa regiun!
28 da mars 2004
Il corp da pumpiers vegn cumplettaus cun novs meinagruppas, numnadamein:
• Roland Cajacob
• Andreas Deflorin
• Adrian Deflorin
• Beat Flepp
• Marco Tschuor
Cordiala gratulaziun!
15 da mars 2004
Grond exercezi regiunal da cader a Curaglia. Ferton ch’ils officiers ein sefatschentai cun l’organisaziun d’in post da commando, han ils meinagruppas empriu da luvrar cun il material dil carr d’uaul.
14 da mars 2004
Ils dus responsabels per igl equipament per barschaments d’uaul han surpriu lur funcziun. Severin Lutz e Remo Monn, pil mument en lur secund emprendissadi sco bostgers, han priu enconuschientscha dil material e fatg per part revisiun.
Tier in barschament d’uaul ei l’integraziun dils bostgers da gronda impurtonza, cunquei ch’els enconuschan il meglier ils uauls. Nos dus pumpiers specialisai ensemen cun ils bostgers en uffeci porschan a nus perquei in grond agid.
7 da mars 2004
A Raveras ha enzatgi inaga dapli dau fiug in container da miardas. Dus pumpiers ein stai allas 11.45 uras en acziun da stizzar.
19 da fevrer 2004
Suenter plirs onns da recrutaziun ei il cader da pumpiers ussa cumplets. Cun ils tschun novs meinagruppas che vegnan a frequentar proximamein ils cuors a Tusaun posseda mintga secziun silmeins in officier e dus meinagruppas.
26 da schaner 2004
La cumissiun da gestiun dalla vischnaunca fa viseta als pumpiers. Duront treis uras prendan els investa dil material, dallas localitads e selaian informar davart l’organisaziun, il futur e nos problems actuals. Nus engraziein ad els ch’els han priu peda da vegnir tier nus, mo era per las bunas, interessantas e fritgeivlas discussiuns.
12 da schaner 2004
Donn d’ieli ad Acletta. La dumengia sera ein ils pumpiers vegni clamai sin in plaz da baghegiar. Ina lingia d’ieli veva piars ieli da scaldar. En in’acziun da duas uras ha quel saviu vegnir ligiaus e dismess. Donns per igl ambient ha ei dau negins, perencunter ha il baghetg en construcziun pitiu donn.
2 da schaner 2004
Exercezis d’introducziun per ils pumpiers novizs. El decuors dil meins schaner vegnan tuts pumpiers novizs (pumpiers ch’entscheivan lur survestch, sco era pumpiers che midan secziun) introduci en lur nova lavur. Aschia san las ruosnas caschunadas entras pumpiers sorti vegnir emplenidas ton pli spert.
