fotografias: Roger Sac (Pumpiers Mustér)

Alexi Loretz ei dapi dus onns cussegliader da segirtad dalla vischnaunca da Mustér. Suenter ver inventarisau tut ils baghetgs e plazs da lavur, suondan mesiras concretas per optimar la segirtad els menaschis communals.

Ils 27 e 28 da settember 2004 han ils emploiai da tuttas spartas giu instrucziun co sedepurtar en cass da fiug e co far diever dils indrezs da stizzar avon maun. Per la scolaziun ein ton ils pumpiers, sco era Roland Cavelti dalla firma Primus stai engaschai.

Ils presents – varga 60 persunas ord las spartas administraziun, scola, center da sport, cudisch funsil, serenera, stradalesser, forestalesser ed ils emploiai dalla Banca Raiffeisen Mustér/Cadi – ein vegni scolai sin dus posts. Al post 1 ha ei giu num emprender co luvrar cun in stezzafiug. Ils participonts han viu las consequenzas ch’il falliu mied da stizzar sa ver el falliu liug. Bein ein tuttas localitads da vischnaunca equipadas aschia che mieds falli ein strusch pusseivels da duvrar, tuttina fa in’explosiun da grass impressiun e muossa beinspert che aua e grass secumportan buc in cun l’auter.

Era il diever dil stezzafiug sto vegnir exercitaus, biars han numnadamein mai luvrau cun in tal uaffen. Ils presents emprendan d’enconuscher las treis sorts da stezzafiug: puorla, spema e gas, vesan ella pratica ils avantatgs e disavantatgs da mintga mied ed emprendan co stizzar. Schizun la cozza da fiug vegn demonstrada per mussar ch’ins sa cun sempels mieds ver grond effect.

Il post 2 muossa in ulteriur mied da stizzar: l’aua, il mied il pli bienmarcau ed il meglier disponibel. La damonda da partenza ei: tgei far sch’ei brischa?

Gia cheu dat ei plirs meinis. En vesta dil temps che passa denter il clom d’urgenza entochen ch’ils pumpiers arrivan, ein ussa denton tuts pertscharts che alarmar ils pumpiers sur telefon 118 ha emprema prioritad. Cun risguardar l’atgna segirtad suonda pér lu la liberaziun da persunas ed animals sco emprovas da stizzar il fiug.

Che stizzar fiug ei buca semplamein derscher aua ed aua sin quel, han tuts era saviu seperschuader. Pil pli tonscha ei cun pauca aua da controllar in fiug e schizun da stizzar quel. Nus lein stizzar il fiug e buca neghentar quel, pia buca caschunar ulteriurs donns entras l’aua!

Ils participonts han giu la pusseivladad d’emprender fatgs interessants davart il fiug e las modas da cumbatter quel cun aua.

Alla fin dil cuors e suenter che tuts han giu stizzau inagada cugl uder pign, han differentas damondas saviu vegnir sclaridas.

L’investiziun da temps da 90 minutas ha valiu la peina, negin ch’ei ius a casa senza ver empriu enzatgei. Aschia ei igl eco era staus positivs.

Igl ei buca l’emprema gada ch’ils Pumpiers Mustér segidan cun talas scolaziuns. Gia la primavera vargada havein nus organisau in semegliont cuors per las vischinas da Segnas. Vischinadis che han medemamein interess d’ina tala scolaziun – cunzun per las dunnas ch’ein duront il di persulas els uclauns – san s’annunziar tier il cumandant.

Diever dil stezzafiug da gas (dioxid carbonic) tier in barschament da liquids.

Han procurau inagada per fiug: Remo Monn e Severin Lutz.