maletgs: Pumpiers Mustér, Hans Huonder
Planisau era ei gia daditg. Ussa suenter ch‘ils plans da seracass ein vegni revidi vein nus decidiu da far igl alarm 2004 en casa da vegls s. Gions. La casa da tgira Sursassiala ei buca stada cumpigliada.
Igl entir exercezi ha pretendiu dabia preparaziun. Aschia ein gia dalla bial‘entschatta era la meinacasa dunna Rita Furger ed il cau tecnic signur Theo Berther stai cumpigliai ellas planisaziuns. Las finamiras ein stadas claras: exercitar ils plans da seracass cun evaquar l‘entira casa s. Gions. La tensiun ei stada gronda, pertgei duas cumponentas eran buc enconuschentas a nus: Co reageschan ils cussadents e tgei fa il persunal? Funcziunescha tut sco tier ils alarms d‘emprova usitai ni dat ei panica? Las damondas ein giustificadas, cunquei ch‘ei ha aunc mai dau ina tal‘acziun en casa. Ils miedis da casa han stuiu vegnir consultai per prevegnir a surpresas.
La sonda, ils 28 d‘uost, eis ei stau aschi lunsch. Allas 09.05 uras ha igl emprem sensur annunziau fem, cuort suenter schizun ils sensurs ell‘alzada sut il tetg. Per il persunal ei quei stau niev, pertgei tier ils exercezis usitai deva ei tochen uss buca fem. „In curios sentiment e la tema da buca far enzatgei endretg“, rapporta ina tgirunza. Mo il persunal ha fatg endretg lur lavur ed ha immediat entschiet cun l‘evaquaziun dalla glieud.
Allas 09.16 uras cuntonscha igl alarm ils pumpiers e la polizia. El medem mument vegnan sanitad ed uniun samaritana clamai. Mo sis minutas pli tard ein elements dallas differentas gruppaziuns gia sil plaz da seracass.
L‘evaquaziun dils cussadents ei gia s‘avanzada ed aschia san ils pumpiers seconcentrar sin lur lavur. Vitier vegn ina liberaziun d‘ina persuna ord il surcombras. Las lavurs van maun en maun ed ei dat negins incaps. Allas 09.50 furas sa premlitinent Florentin Tenner schar interrumper las lavurs.
Bilanza digl exercezi: Tuttas forzas engaschadas han prestau oreifra lavur. Las finamiras tschentadas ein vegnidas contonschidas en tuts graus. Nossa tema ch‘ils cussadents savessien reagar panicamein ei stada vana, anzi, tras la lavur ruasseivla da tuts ha ei dau insumma negins muments da panica. La lavur dils pumpiers ei stada fetg buna. Da menziunar fussen treis piculezzas che sespiardan denton enteifer ils biars puncts positivs. Igl exercezi ei gartegiaus per cumpleina cuntentientscha da tuts, ils plans da seracass ein aschia praticabels.
Entras la reacziun sperta dil persunal savein nus dir ch‘ei vess dau en quella situaziun negins blessai.
Decuors
09.06 alarmaziun automatica interna, fem el surcombras
09.08 alarmaziun automatica 3. alzada, entschatta dall‘evaquaziun
09.12 alaramaziun externa
09.16 alarmaziun pumpiers e polizia
09.17 clom per sanitad ed uniun samaritana
09.22 emprems pumpiers e vehichels sil plaz, finiziun dall‘evaquaziun
09.24 ADP e schurmetg da flad sil plaz
09.26 tuttas lingias da transport e pressiun per controllar igl incendi ein en funcziun
09.27 entschatta dil salvament surcombras
09.30 surcombras ei controllaus, ina persuna anflada, entschatta dalla liberaziun
09.40 liberaziun terminada e pazient ei surdaus alla sanitad
09.50 interrupziun digl exercezi
10.30 pumpiers puspei promts, sistem d‘alarm en funcziun
Tgei savein nus emprender?
Grazia als plans da seracass ha praticamein tut funcziunau senza incaps. Il persunal sa migliurar il proceder d‘alarmar entras activar directamein igl alarm extern, senza spitgar entochen che la centrala fa quei automaticamein. Aschia san ins gudignar temps custeivel. L‘alarmaziun dils pumpiers senza sirena e mo sur SMT sto aunc daventar pli effectiva entras colligiar tuts telefons mobils dils pumpiers (il plan da seracass preveda denton era da clamar en mintga cass ils pumpiers vischins).
Engraziament: Suandontas persunas han procurau per il beinreussir digl exercezi:
• Rita Furger, meinacasa
• Theo Berther, cau tecnic e pedel
• Stiafen Furger, pazient
In engraziel special va era als cussadents dalla casa, al persunal, alla basa d‘ambulanza Mustér cun Ignaz Furger e Vigeli Lutz, all‘uniun samaritana ed a tuts camerats da pumpiers per il super engaschi.
