Text: G. Tenner Fotos: R. Schmed 

Per informaziun: l‘entira inscenaziun ei stada mo in exercezi. Aschia ein era las finamiras stadas las usitadas. Tuttina vein nus aschuntau duas supplementaras: 

• stabilisaziun d‘in vehichel en territori grev 

• spindrament d‘ina persuna sut circumstanzas engreviadas 

Per treis pumpiers ha igl alarm allas 19.09 uras muntau in niev pass en lur scolaziun sco pumpiers dil salvament sin via. Per l‘emprema gada han els giu ensemen cun il team dad ulteriurs 14 pumpiers in alarm. Sco observatur han ins era gest fatg persenn ch‘ei deva el team bein preparau novas persunas. Malgrad quella midada ha la lavur dils pumpiers funcziunau senza problems. Cun Florian Giger sco meinagruppa specialisau han las treis persunas saviu vegnir spindradas ord lur vehichel. Sustegn han ils pumpiers obteniu ina gada dapli dil survetsch da sanitad 144 cun Ignaz Furger e Noëlle Tenner. Era las duas scolastas samaritanas ein segidadas vid l‘acziun.

La fixaziun dil vehichel ha sco previu caschunau gronds problems che han igl emprem stuiu vegnir sligiai. Quella lavur ha pretendiu dapli temps che usitau. Persuenter ei il resultat staus zun cuntenteivels e la lavur per liberar ils pazients ha saviu entscheiver senza difficultads.

Mo era per la sanitad vein nus procurau per rumper tgau. La situaziun cun ils treis pazients era sin l‘emprema egliada nuota schi cumplicada. Suenter ina diagnosa sperta nua ch‘igl ei semussau ch‘igl autist e la persuna dasperas eran meins blessai, mo il giuven ch‘era enserraus denter ils dus sezs davontier e ch‘era senza schientscha, ha la successiun dils spindraments stuiu vegnir reponderada e midada.

Igl emprem ei la persuna meins blessada vegnida liberada. Silsuenter ei igl autist vegnius spindraus ord sia situaziun smisereivla. Aschia ha ei dau plaz per far il spindrament il pli urgent, numnadamein quel dil giuven senza schientscha.

Las liberaziuns han cuzzau dapli che in‘ura e mesa, quei en tutta ferdaglia. Las temperaturas bassas han denton buca disturbau l‘acziun, sil pli il team digl ADP ha giu da cumbatter cun glatsch e scheltira. 

Las finamiras ein vegnidas contonschidas. Naturalmein ch‘era quei exercezi ha mussau entginas fleivlezias. Quellas ein denton buc aschi relevantas, basegnan denton ina migliur. Ord ils sbagls emprendan ins ed aschia essan nus semtgai per la proxima acziun. 

Engraziel 

Mintga gada che nus exercitein in da nos accidents sin via astgein nus guder igl agid nuncumplicau e spontan da nos partenaris. Nus engraziein perquei: 

• als pazients Graziella, Giohen e Stiafen 

• a Blandina Bundi e Letizia Schmed per las mulaschas 

• ad Ignaz Fruger e Noëlle Tenner dil survetsch da sanitad 144 

• a Felici Deflorin, Polizia cantunala grischuna 

• a Herbert Wetzel (Garascha Wetzel) e siu team per semtgar il plaz e vehichel d‘accident 

• a tuts pumpiers dalla Basa da salvament sin via Mustér