25 da december 2003
In grond regal da Nadal ha quei bab giu la sera dils 25 da december allas 21.06 uras. Per cantar la canzun da bunanotg ha el envidau ina sbrenzla vid il pigniel da Nadal. Sbrenzlas han inflammau parts dalla stalla sut il pigniel. Immediat ha era quel entschiet a barschar. Grazia al stezzafiug che sesanflava dasperas ha il bab saviu stizzar il pigniel. Per segirtad ha el clamau igl officier da pichet sut il nummer 118 sil plaz. Il stezzafiug ei en quellas minutas sepagaus pliras gadas. Senza quei uaffen vess la habitaziun e forsa schizun la casa pigliau fiug.
21 da december 2003
Ils 19 da december ha la gruppa ssv giu in exercezi special. Alex Heim, nies pumpier tudestg, ha presentau il salvament sin via dalla Tiaratudestga. Suenter ina part teoretica ha el raquintau da differents accidents nua ch’el ei staus sil plaz da seracass. Dad el havein nus astgau retscheiver differents tips e trics che gidan franc era nus egl avegnir.
12 da december 2003
Questa notg allas 00.59 uras ei la gruppa ssv dils Pumpiers Mustér vegnida clamada ad in grev accident da traffic sin la Via Alpsu. Sill’altezia dil Hotel Bellavista ein dus autos cupitgai taluisa in cun l’auter ch’ils pumpiers han stuiu liberar duas persunas ord ils vehichels. Ils pazients – per part grev blessai – ein vegni transportai cun la REGA e cun duas ambulanzas els spitals da Cuera e Glion.
Malgrad ch’in tal accident ei mai vegnius trenaus en aschi grondas dimensiuns, ha la collaboraziun denter la polizia, la sanitad ed ils pumpiers funcziunau excellentamein.
1 da december 2003
Il cudischet 2004 ei cumparius! El cuntegn las novaziuns per il corp per igl onn vegnent, las gliestas dils pumpiers e l’organisaziun dil corp. Il cudischet survegnan ils pumpiers e persunas involvadas el corp sin pupi tarmess a casa ensemen cul program da lavur 2004 che cumpara ils proxims dis.
28 da november 2003
Onn per onn caschunan barschaments da tschupials d’advent e pigneuls da Nadal donns da plirs milliuns en Svizra. Quei sto buc esser!
18 da november 2003
Cuors per menaders d’acziun a Tusaun. Da nos pumpiers ein duas persunas presentas.
18 d’october 2003
Gest en tschun loghens brischan las plauncas denter la Punt Stalusa e Mustér. Motiv per ils barschaments: la locomotiva da vapur dalla Viafier Retica. 19 pumpiers ein stai en acziun.
14 d’october 2003
Alla seduta dalla cumssiun da fiug ein 10 pumpiers vegni relaschai dil survetsch activ e 7 pumpiers novs vegni recepi. Plinavon ein las perstgisas per 2003 vegnidas tractadas.
13 d’october 2003
Alarm SSV a Pardomat. Impressiuns da nies fotograf cheu sut.
1 d’october 2003
La fueina dil fiug a Rusettas ei anflada. La raschun dil fiug ei ina cigaretta ni in zulprin ardent. Cun agid dalla gruppa forestala e da dus pumpiers ha il fiug saviu vegnir stizzaus.
30 da settember 2003
Barschament da pastira a Rusettas (Val Clavaniev). Muort la stgiraglia eis ei tochen uss buca stau pusseivel d’eruir la fueina dil fiug.
25 da settember 2003
La firma Transco Sedrun, responsabla per las lavurs da construcziun vid la NEAT, informescha davart igl access al plazzal da lavur en in seracass. Igl access ei mo pli pusseivels sur la Via Cavorgia.
La Dertgira administrativa dil cantun Grischun dat dretg ad ina vischnaunca che ha sfurzau ina persuna da prestar survetsch da pumpiers.
15 da settember 2003
Ils geraus responsabels ensemen cun ils cumandant dallas vischnauncas vischinas visetan il local d’emplenir butteglias a Raveras.
10 da settember 2003
Il scamond da fiug vegn abolius.
23 d’uost 2003
Alarm per ils pumpiers dalla basa d’ieli Laax. Per saver frenar igl ieli che cuora dil Rein da Fontanivas ora ston els erreger ina barriera sill’altezia dalla cava da gera. L’entira caussa ei denton mo in exercezi.
14 d’uost 2003
Allas 13.00 uras ha in cametg caschunau in pign barschament da pastira/uaul en Val da Crusch sut Stagias. Habitonts dil vitget da Mumpé Tujetsch han alarmau ils pumpiers. Muort munconza d’indicaziuns claras eis ei all’entschatta buca stau pusseivel da localisar il fiug.
18 pumpiers ein stai en acziun. Grazia agl auto da pressiun eis ei stau pusseivel da stizzar il fiug cun dus tancs d’aua ed entgina lavur cun risti e pala senza incaps. Suenter strusch 4 uras ei l’acziun stada terminada.
7 d’uost 2003
Naven dad immediat entochen ils 20 d’uost san persunas che han interess da prestar survetsch da pumpiers s’annunziar. 3 d’uost 2003
Barschament d’uaul a Mumpé Tujetsch.
31 da fenadur 2003
Il scamond da fiug resta vinavon en vigur. Aschia eis ei scumandau da schar ir rachettas ed arder fiugs da tuttas sorts sin territori da vischnaunca. Il scamond vegn controllaus dils pumpiers. Persunas che cunterfan al scamond vegnan fatgas responsablas per tut ils donns.
29 da fenadur 2003
Alarm el hotel Disentiserhof. Dapli davart nies alarm d’exercezi sut.
26 da fenadur 2003
Mardis, ils 22 da fenadur allas 11.15 uras sesarvan las portas dallas neblas aschi fetg ch’in urezi caschuna donns d’aua ella banca Raiffeisen a Mustér. Cun dus pumpiers sa la situaziun vegnir migliurada fetg spert, il rest ei caussa dil pedel.
16 da fenadur 2003
Igl Uffeci forestal dil Grischun fa attents sin in fetg grond prighel da barschaments. Dapi oz ei la classificaziun da prighel vegnida alzada egl entir cantun per in scalem, quei che munta per la Surselva la classa la pli aulta cun in absolut scamond da far fiug el liber.
20 da zercladur 2003
Il persunal dil hotel Disentiserhof vegn scolaus co sedepurtar en cass da fiug. La segirtad dils hosps ei fetg impurtonta per Ueli Stümpfig, il direcur dil hotel. Mintg’onn porscha el in’informaziun al persunal. Era exercezis interns e culs pumpiers han adina puspei liug.
28 da matg 2003
Exercezi communabel dils corps da pumpiers Medel e Mustér a Stagias.
21 da matg 2003
Furniziun dallas novas capellinas. Mintga pumpier ei ussa equipaus tenor las normas vertentas. Las capellinas ein vegidas furnidas dalla firma Rosenbauer.
11 da matg 2003
Barschament da cultira a Cresta sut Faltscharidas. Burnida ord il tgamin dalla locomotiva da vapur dalla Viafier Retica ha caschunau in incendi oz suentermiezdi cuort suenter gentar.
10 da matg 2003
Exercezi d’alarm communabel dils Pumpiers Tujetsch cun il pichet dils Pumpiers Mustér ella Val Bugnei.
9 da matg 2003
La maschina d’emplenir butteglias ei en funcziun. Pil mument caschunan las butteglias veglias aunc problems, butteglias novas perencunter funcziuneschan d’emplenir senza problems.
6 d’avrel 2003
Entras ina nova repartiziun digl uorden egl auto da pichet eis ei pusseivel da deponer leu 4 apparats pil schurmetg da flad.
La firma Interspiro furnescha las novas mascras Interspiro S.
31 da mars 2003 – 4 d’avrel 2003
Cuors per novs meinagruppa a Tusaun. Per ils Pumpiers Mustér absolveschan cun success: Armin Berther, Roger Lutz, Teodosi Maissen, Martino Sabbadini e Florian Giger.
28 e 29 da mars 2003
Dis da scolaziun per ils officiers a Trun.
26 e 27 da mars 2003
Cuors per novizs dil schurmetg da flad a Vaz sut. Per ils Pumpiers Mustér separticipeschan: Aldo Casanova, Beat Flepp e Mario Schuoler.
25 da mars 2003
Exercezi communabel cun il cader da pumpiers da Tujetsch e Medel/Lucmagn. Sco davosa viseta essan nus a Sedrun per prender investa dil corp da pumpiers Tujetsch. Cun quei exercezi ei l’emprema fasa da nossa collaboraziun terminada. La secunda fasa dils exercezis communabels sa entscheiver.
24 da mars 2003
Dapi tschun onns ein ils Pumpiers Mustér online. Denter ils pumpiers grischuns essan nus cheutras ils pioniers. Nossa pagina ei l’emprema insumma ch’ei adina puspei vegnida actualisada. Sch’ins mira per la reit entuorn stuein nus deplorablamein constattar ch’aunc paucs corps ein presents. Era l’Associaziun grischuna da pumpiers sesprova adumbatten da dumignar ils corps sigl internet. Quels tschun onns han denton purtau biars avantatgs. Entras la pagina vein nus contact cun bia corps era ordeifer la Svizra. Adina puspei vegnin nus contactai per email ni posta, survegnin damondas, mo vein era la pusseivladad da dumandar experientschas en connex cun material, tactica ed auter. La presentaziun d’avon in onn el “Feuerwehr Magazin” ei medemamein d’engraziar a nossa pagina che vegn visitada en media da 3560 persunas ad onn.
20 da mars 2003
La firma Komprag SA da Dällikon vegn a furnir igl agregat per emplenir butteglias dil schurmetg da flad. La maschina vegn montada a Raveras en ca. 5 jamnas. Informaziuns pli detagliadas sco era ina presentaziun suondan pli tard.
7 da mars 2003
Signur Deflorin dalla Polizia cantunala grischuna referescha davart entgins puncts en connex cun accidents da traffic, pumpiers en general, mo dat era cussegls per il mintgadi sco autists.
6 da fever 2003
La vischnaunca da Mustér ei periclitada da lavinas. Ils pumpiers segidan da serrar e controllar las vias.
25 da schaner 2003
19 pumpiers novizs separticipeschan al cuors d’introducziun che ha liug a Mustér, da quei ein quater pumpiers da Tujetsch.
14 da schaner 2003
Gion Albin vegn elegius sco representant dils vischins ella cumissiun da fiug. Aschia ei quella puspei cumpletta suenter che era Giusep Caduff ei vegnius confirmaus.
1 da schaner 2003
La notg da Silvester ei vargada senza problems. Nus engraziein alla populaziun da Mustér per la precauziun enten agir cun fiug.
11 da schaner 2003
Il niev equipament persunal sa vegnir retratgs.
Adatg: prighel da fiug!
12 da schaner 2003
Il plan da lavur 2003 ei repartius. Ils puncts principals da nossa lavur anfleis Vus era sin nossa homepage.
