Text: G. Tenner, meinacziun pumpiers  Fotos: B. Petschen     

Sonda, ils 12 da december 2003, cuort avon l’ina dalla damaun. Sin la Via Alpsu, all’entrada dalla garascha dil Hotel Cucagna amiez il vitg da Mustér cupetgan dus vehichels da persunas in cun l’auter. Ils passaschiers ein enserrai els vehichels e per part grevamein blessai. Passants ch’ein sin viadi a casa observan igl accident ed alarmeschan immediatamein gest polizia, sanitad e pumpiers ensemen. Allas 00.59 uras contonscha igl alarm ils pumpiers dil pichet ssv (salvament sin via). Igl emprem seracass cun accidents e blessai ha priu si’entschatta. Il temps ideal d’alarm e la reacziun correcta dils presents caschunan che polizia, sanitad e pumpiers arrivan suenter cuort temps pli u meins ensemen sil plaz, cuort sisu vegn era igl emprem miedi. Suenter ina triascha decida quel davart la successiun dallas liberaziuns. Quellas ston succeder cun uaffens hidraulics specials. Duront che la squadra digl ADP segirescha il plaz d’accident preparan ils ulteriurs pumpiers il material necessari. Il manischunz digl emprem vehichel ei blessaus aschi fetg che la REGA sto surprender il transport el spital. Suenter rodund ina mes’ura arriva era l’ambulanza dil spital da Glion sil plaz. Dus miedis e plirAs assistentAs tgiran ensemen cun pumpiers ils blessai. Ord raschuns da segirtad e per buca disturbar il ruaus da notg setschenta il helicopter a Salaplauna. Suenter ch’ils pazients ein stabilisai succeda il transport els spitals vischins. Per ils pumpiers, la polizia ed il TCS entscheivan las lavurs da rumida provisoria. L’acziun finescha suenter che tut ei semtgau per in proxim seracass allas 04.15 uras.  In accident da tala dimensiun vein nus tochen oz buca giu la pusseivladad da trenar. Tuttina ei la lavur ida maun e maun, gie, ei stada exemplarica. Ils presents ein stai surstai dallas pusseivladads tecnicas e dall’infrastructura che las treis organisaziuns san porscher. Ils salvaments ein aschia succedi senza incaps ed a moda fetg professiunala. Ei resta a nus da giavischar als pazients buna reconvalescenza. A tuts gidonters in cordial engraziament.    Persunas e material stai en acziun  Polizia   1 polizist  1 vehichel   Sanitad   3 miedis d’urgenza  6 assistents da salvament  2 ambulanzas  1 helicopter   Pumpiers   15 pumpiers  1 ADP  2 vehichels d’acziun  TCS  1 um  1 vehichel da transport